Ermənistanda Nikol Paşinyan hakimiyyətinə qarşı olan qüvvələr inqilab etməklə hakimiyyəti devirmək istəyir.

Belə ki, Ermənistanda müxalifət yenidən hökumət əleyhinə aksiyalara başlayacağını elan edib. Bu barədə müxalif Daşnaksütyun Partiyasının üzvü İşxan Saqatelyan bildirib.

O qeyd edib ki, İrəvan bələdiyyəsinə noyabrın 9-10-da saat 18:00-dan 20:30-dək paytaxtın Azadlıq meydanında mitinq keçirmək niyyəti barədə bildirib. Bələdiyyə öz növbəsində bu barədə məlumatı aldığını açıqlayıb.

Bəllidir ki, Ermənistandan əsas müxalif qüvvə sabiq prezidentlər Robert Köçəryan və Serj Sarkisyan hesab olunur. İstisna deyil ki, məhz bu mitinqlərin təşkilatçıları da məhz onlardır. Köçəryan artıq müharibədən sonra Ermənistanda keçirilən növbədənkənar parlament seçkilərində namizəd olub və Paşinyana məğlub olub. Bu baxımdan hesab olunur ki, Köçəryan və Sarkisyan birliyinin məqsədi inqilab vasitəsilə Paşinyanı devirməkdir.

Faşist düşüncəli Köçəryan-Sarkisyan birliyi və daşnaklar Paşinyanı devirməyi bacarsalar nə baş verəcək? Bunun Azərbaycanla münasibətlərə və 10 noyabr Bəyanatına təsiri necə olar?

Politoloq Tural İsmayılov Cebhe.info-ya açıqlamasında deyib ki, Köçəryan və Sarkisyanın Paşinyanı devirib yenidən hakimiyyətə gələcəyi inandırıcı deyil:

“Çünki Ermənistanda keçirilən növbədənkənar parlament seçkiləri də göstərdi ki, erməni xalqı Paşinyan nə qədər pis Baş nazir olsa da, Ermənistanı uzun illər blokadada saxlayan, onun sərvətlərini talayan, korrupsiyanı, dövlət büdcəsinin talanmasını adi hala gətirən Köçəryana və Sarkisyana güvənmir.Düşünmürəm ki, növbəti dəfə hansısa seçkidənkənar yolla Köçəryan və ona bağlı qüvvələr yenidən hakimiyyətə gəlsin. Sarkisyanın isə ümumiyyətlə, belə bir şansı yoxdur. Çünki Paşinyandan əvvəl Sarkisyan hakimiyyətdə olub və devrilib.

Hətta bu ssenari baş versə belə, Ermənistanın Baş naziri Nikol Paşinyanın imza atdığı 10 noyabr Bəyanatında Azərbaycan və Rusiya rəhbərlərinin imzaları var. Bu, Paşinyan hakimiyyəti üçün xarakterik olan imza, addım deyil, Ermənistanın imzasıdır.
Paşinyandan sonra hakimiyyəti kimin gəlməsindən asılı olmayaraq 10 noyabr Bəyanatını poza bilməz. Bu bəyanatın pozulması təkcə Azərbaycana qarşı deyil, eyni zamanda Rusiyaya da müharibə elan etmək deməkdir”.