“Ermənistanın Dağlıq Qarabağa 200 milyon dollar ayırması Azərbaycana birbaşa təcavüz kimi qiymətləndirilməli və Ermənistan buna görə cavab verməlidir. Rəsmi İrəvanın belə hərəkətləri qəbuledilməzdir. Hesab edirəm ki, Azərbaycan Xarici İşlər Nazirliyi bu məsələyə ciddi münasibət bildirməli və Ermənistana yerini göstərməlidir”.

Bu fikirləri Reyting.az-a politoloq Oqtay Qasımov bir neçə gün əvvəl Ermənistan hökumətinin Azərbaycanın nəzarətindən kənarda qalan Dağlıq Qarabağa 200 milyon dollar maliyyə ayırmasından danışarkən deyib.

Politoloq bildirib ki, Ermənistanın bu addımı noyabrın 10-da imzalanan üçtərəfli anlaşmaya ziddir:

“Təəssüflər olsun ki, biz 10 noyabr anlaşmasının tam şəkildə yerinə yetirildiyini müşahidə etmirik. Düşünürəm ki, Azərbaycan cəmiyyəti və hakimiyyətinin birinci tələbi 10 noyabr anlaşmasının yerinə yetirilməsi olmalıdır”.

O. Qasımov əlavə edib ki, indiki fəlakətli durumunda Ermənistanın Dağlıq Qarabağa ayırmaq istədiyi 200 milyon dolları haradan tapacağı da müəmmalıdır: “Bu məndə sual doğurur. Çünki Ermənistanın ciddi maliyyə sıxıntıları var. Odur ki, mən bu addımı daha çox 20 iyunda nəzərdə tutulan parlament seçkiləri ərəfəsində Ermənistanın daxili aditoriyasına yönələn təbliğat xarakterli addım kimi qiymətləndirirəm. Erməni cəmiyyətinə mesaj verilir ki, erməni hökuməti məğlubiyyətə və ağır duruma baxmayaraq Dağlıq Qarabağan diqqətini ayırmır və oradakı sosial-iqtisadi məsələlərin həllində iştirak edir. Əlbəttə, bu, qəbuledilməzdir və Azərbaycan hakimiyyəti buna ciddi münasibət bildirməlidir”.

Politoloq hesab edir ki, Rusiya qarşısında məsələlər ciddi şəkildə qoyulmalıdır: “Həm Dağlıq Qarabağdakı 20 mindən artıq Ermənistan hərbçisinin çıxarılması, həm də bölgənin silahsızlaşdırılması həllini tapmalıdır. Bu olmayacağı təqdirdə yeni savaş hər zaman gündəmdə qalacaq.

Görünən odur ki, Rusiya ilə aparılan danışıqları və bölgədə rus sülhməramlıların olması erməni tərəfini xeyli ürəkləndirir. Diqqət etdikdə görürük ki, avantürist, revanşist və nifrət toxumu səpən bəyanatların sayı artır. Hansısa “müstəqil artsaxdan, onun sərhədlərindən” söhbət gedir. Hətta erməni cəmiyyətinin siyasi qüvvələri savaşın bitmədiyini bildirirlər. Bu baxımdan durum mürəkkəbdir və Ermənistanın belə hərəkətləri təhlükə və narahatlıq mənbəyidir”.