Bakı Apelyasiya Məhkəməsində “Azərbaycan Beynəlxalq Bankı” ASC-nin İdarə Heyətinin sabiq sədri Cahangir Hacıyev, sabiq deputat Dünyamin Xəlilov və digərləri, həmçinin mülki iddiaçı Vergilər Nazirliyinin apelyasiya şikayəti üzrə məhkəmə prosesi davam edib.

Hakim Həsən Əhmədovun sədrliyi ilə keçirilən prosesdə məlum olub ki, Cahangir Hacıyevin bacanağı cinayət işində təqsirləndirilən şəxs olan İsmayıl Hidayətzadə də apelyasiya şikayəti verib.

Hakimlər onun şikayətinə C. Hacıyevin şikayəti ilə eyni icraatda baxılması ilə bağlı qərar qəbul ediblər.

Cahangir Hacıyevin vəkilləri vəsatətlə çıxış edərək bildiriblər ki, müvəkkili barəsində olan birinci hökmlə bağlı qanunvercilikdə olan dəyişiklərə əsasən Sabunçu Rayon Məhkəməsinə ərizə veriliblər.

Həmin ərizədə qeyd olunub ki, dəyişikliklərə əsasən Cinayət Məcəlləsini 179-cu maddəsinin sanksiyasının yuxarı həddə olan cəzası aşağı salınıb. Vəkillər Cahangir Hacıyevin cəzasının azaldılması ilə bağlı Sabunçu rayon Məhkəməsinə müraciət ediblər.

Vəkillər yanvarın 14-də məhkəmədə həmin ərizəyə baxılacağını qeyd ediblər. Bu səbəbdən məhkəmənin təxirə salınmasını istəyiblər.

Məhkəmə prosesi yanvarın 21-ə təyin edilib.

Yada salaq ki, Bakı Ağır Cinayətlər Məhkəməsinin hökmü ilə Cahangir Hacıyev əvvəlki cəzası toplanmaqla qəti olaraq 16 il 6 ay, sabiq deputat Dünyamin Xəlilov isə əvvəlki cəzası ilə toplanmaqla qəti olaraq 14 il 6 ay müddətinə azadlıqdan məhrum edilib. Təqsirləndirilən İsmayıl Hidayət-zadəyə isə 5 il 6 ay müddətinə azadlıqdan məhrum etmə cəzası təyin olunub.

Digər təqsirləndirilən şəxslər – Camal Həsənov, Sərxan Rəsulov, Natiq İmanov, Samir Hacıyev, Təbriz Əbdülhəmidov, Mahir Qafarov, Sadıx Murtuzayev, Tərlan Məhərrəmov, Fəxrəddin Heybətov, Ramin Əhmədov, Fariz Muradov, Səlahəddin Qədirov, Erxan Cavad, Arif Ramazanov, Navai Şirinov, Svetlana Əsədullayeva, Arif Mədətov, Adil Mikayılov, Ramis Kərimov barəsində isə şərti cəza təyin edilib.

C.Hacıyev mənimsəmə və israf etmə, cinayət yolu ilə əldə edilmiş pul vəsaitlərini və ya digər əmlakı leqallaşdırma, vergidən yayınma, vəzifə səlahiyyətlərini aşma və digər əməlləri törətməkdə təqsirli bilinib.

Rəsmi məlumata əsasən, aparılmış istintaqla 2001-2015-ci illərdə “Azərbaycan Beynəlxalq Bankı” ASC-nin İdarə Heyətinin sədri vəzifəsində işləmiş C.Hacıyevin göstərişləri əsasında ayrı-ayrı ölkələrdə yaradılmış hüquqi şəxslərlə real dəyəri olmayan sadə veksellərin alqı-satqısına dair 3,4 milyard ABŞ dolları və 987 milyon avro məbləğində (müvafiq dövrün məzənnəsi ilə 3,8 milyard manat) müqavilələr bağlanılaraq qanunsuz veksel əməliyyatları aparılmasına dair əsaslı şübhələr müəyyən edilib.

Aparılmış istintaqla C.Hacıyevin tanışı Dünyamin Xəlilov, digər 20 nəfər və qeyriləri ilə birlikdə qanunsuz maliyyə əməliyyatları aparılan və real dəyəri olmayan veksellərin alınması, eləcə də təminatı olmayan kreditlərin verilməsi yolu ilə, ümumilikdə, 4,7 milyard manat məbləğində pul vəsaitinin mənimsəmə və digər cinayətlər yolu ilə 2,5 milyard manat hissəsini ələ keçirməklə cinayət yolu ilə əldə edilmiş həmin vəsaitin 2 milyard manatını leqallaşdırmasına, digər 2,2 milyard manat məbləğində pul vəsaitinin isə müxtəlif əməliyyatlara yönəltməklə “Azərbaycan Beynəlxalq Bankı” ASC-yə ziyan vurmasına əsaslı şübhələr müəyyən edilib.

Xatırladaq ki, bundan əvvəl də C.Hacıyev Bakı Ağır Cinayətlər Məhkəməsinin hökmü ilə 15 il, D.Xəlilov 13 il və İ.Hidayət-zadə isə 7 il müddətinə azadlıqdan məhrum edilib. Bakı Apellyasiya Məhkəməsinin qərarı ilə D.Xəlilovun cəzası 13 ildən 12 il 9 aya, Ali Məhkəmənin qərarı ilə İ.Hidayət-zadənin cəzası 5 ilə endirilib.

Sentyabr ayında Nizami Rayon Məhkəməsi İ.Hidayətzadənin cəzasının qalan hissəsinin şərti hesab edilərək azadlığa buraxılması barədə qərar verib.

Bəs, vəkillərin istinad etdiyi Cinayət Məcəlləsini 179-cu maddəsinin sanksiyası necə dəyişib və sabiq bankirin cəzası nə qədər azaldıla bilər. Bu səbəbdən internet resurslarından əldə etdiyimiz bilgiləri oxuculara çatdırırıq.

Dəyişən 179-cu maddədə nələr var?

1.63.1. 179.1-ci maddənin sanksiyasında “ictimai işlər və ya” sözlərindən sonra “iki ilədək müddətə islah işləri və ya iki ilədək müddətə azadlığın məhdudlaşdırılması və ya” sözləri əlavə edilsin;

1.63.2. 179.2-ci maddənin sanksiyasında “üç ildən yeddi” sözləri “bir ildən üç ilədək müddətə azadlığın məhdudlaşdırılması və ya iki ildən beş” sözləri ilə əvəz edilsin;

1.63.3. 179.3.3-cü maddə ləğv edilsin və müvafiq olaraq 179.3.2-ci maddənin sonundakı nöqtəli vergül işarəsi tire işarəsi ilə əvəz edilsin;

1.63.4. 179.3-cü maddənin sanksiyasında “yeddi ildən on iki” sözləri “beş ildən on” sözləri ilə əvəz edilsin;

1.63.5. aşağıdakı məzmunda 179.4-cü maddə əlavə edilsin:

“179.4. Bu Məcəllənin 179.1-179.3-cü maddələrində nəzərdə tutulmuş əməllər xüsusilə külli miqdarda ziyan vurmaqla törədildikdə – on ildən on dörd ilədək müddətə azadlıqdan məhrum etmə ilə cəzalandırılır.”

Qeyd edək ki, C.Haciyevin məhkəmə işi xeyli dolaşıq məqamlar da var. Bu səbəbdən sabiq bankirin cəzasından nə qədər azldılacağını demək çətindir. C.Hacıyev ötən ilin sentyabr ayında başa çatan məhkəməsində son sözdə ittihamı qəbul etmədiyini bildirib: “Burada heç bir şahid mənim əleyhimə ifadə vermədi. Bankdan götürülən pullar isə layihələrə xərclənib, hamısının təyinatı göstərilib. Buna görə də hesab edirəm ki, barəmdə bəraət hökmü çıxarılmalıdır”. Yada salaq ki, 2015-ci ilin dekabr ayından həbsdədir. Bu artıq 4 il cəza müddətinin arxada qalmasıdır. Daha 4 il “srok”undan götürülərsə, bu o anlama gəlir ki, sabiq bankir daha 8 il həbsdə yata bilər. Amma mümkündür ki, bir neçə il sonra o əfv üçün müraciət etsin. (musavat.com)