Bakıda I Sverdlov döngəsi 6 və Şamil Əzizbəyov 153 küçələrinin bir qrup sakini “Grand Plaza” şirkətindən şikayətçidirlər.

Onlar bununla bağlı “Qafqazinfo”ya müraciət ediblər. Çəkiliş aparmaq üçün sözügedən küçələrdə olduq.

Məlum oldu ki, “Grand Plaza” şirkəti 2018-ci ildə bu ərazini alıb və çoxmərtəbəli yaşayış binası tikəcək. Bir qrup ailə şirkətin onlara təklif etdiyi məbləğlə razılaşaraq köçüb. Qalanları isə şirkətin təklif etdiyi məbləğlə razılaşmır. Hazırda həmin evlərin həyətində dağınıq vəziyyətdə tikililər var.

I Sverdlov döngəsi 6-da yaşayan sakin Tahirə Əliyeva qeyd edib ki, iki ildir belə dağınıq şəraitdə yaşayır: “Körpə nəvələrimiz var. O gün divar aşıb az qala uşağın başına uçmuşdu. Burada insan yaşamaz. Şəhərin mərkəzində, iki il adama bu qədər əziyyət vermək olar?!”.

Sözügedən ünvanın digər sakini Malik Mansurov deyib ki, “Grand Plaza” həyətdə gecə vaxtı gəlib söküntü aparıb: “Evin damlarını dağıdanda nəfəs almaq mümkün deyildi. Bizi adam yerinə qoymadılar. Məqsədyönlü şəkildə birinci damı sökməyə başladılar ki, başqa mənzillərə də ziyan dəysin. Məhkəmədə biz niyə cavabdeh kimi getməliyik ki? Onlar bizim evimizə gəlib giriblər”.Ş. Əzizbəyov küçəsinin sakini Türkan Səmədov bildirib ki, evinin sahəsi 150 kvadratmetrdir: “2018-cı ilin yanvarında şirkətin nümayəndələri gəlib dedilər ki, bu evləri alıblar. Halbuki camaatla razılığa gəlməyiblər. Burada elə adam var idi ki, pula, mənzilini genişləndirməyə ehtiyacı var idi. Ancaq mənim ehtiyacım yoxdur. Təmirli evim var. Şirkət bizi məhkəməyə verdi ki, qalan ailələr evindən çıxmır, çox pul istəyir. Hazırda işə Nəsimi rayon Məhkəməsində baxılır. Onların heç tikintiyə icazə sənədləri də yoxdur”.

Məsələ ilə bağlı “Grand Plaza” şirkəti ilə əlaqə saxladıq. Şirkətin əməkdaşı Yavər Şahbazov “Qafqazinfo”ya bildirib ki, həmin ünvanda sakinlərə kvadratı 2300 manatdan pul təklif edərək bir neçə sakini köçürüblər: “Qalanlar isə bu məbləğlə razılaşmaq istəmir. Ona görə də söküntünü saxlamışıq. Onlara tikdiyimiz binada ev də təklif edirik.

Kirayəyə köçürürük. Ayda 400-500 manat kirayə üçün pul veririk. 1 ildir söküntünü dayandırmışıq. Həyət-bacanı təmizləmişik. Axı onlara pis şərait yaradılmayıb. Sökülən evin içinin onlara nə aidiyyatı var ki? Söksək, divarları sökərdik. 1 ildir onları narahat etməmişik. Əksinə, köçən sakinlər narazılıq etməlidir ki, onlar 1 ildir ki, kirayələrdə qalıblar. Biz binanı tikib onları evlə təmin edə bilməmişik. 4-5 nəfərə görə camaatın hüquqları pozulur. Qiymətləndirmə şirkəti gəlib onların evinə 1750 manat qiymət qoydu. Biz onlara 2300 manat pul verdik”.

Günel Türksoy

Foto-Video: Pərvin Zeynal