2012-ci ildə Zaqatala və Qaxda baş verən zəlzələdən ziyan çəkənlərə ev tikdirəcəyini söz verib onları aldadan “FHN” əməkdaşı yenidən hakim qarşısına çıxarılacaq.

AzNews.az-ın məlumatına görə, cinayət məcəlləsinin 178.3.2-ci maddəsi ilə məhkum olunan Adıgözəlov Toğrul Rza qızının məhkəmə prosesi Nərimanov rayon Məhkəməsində hakim Hafiz Kamranovun sədrliyi ilə keçiriləcək.

Məlumata görə, 2015-ci ilin dekabr ayında Zaqatala rayonunun bir qrup sakini Zaqatala RPŞ-yə müraciət edərək həmin şəxs tərəfindən aldadıldıqlarını, pullarının mənimsənildiyini bildiriblər. Zərərçəkmişlərin sözlərinə görə, özünü Fövqəladə Hallar Nazirliyinin əməkdaşı kimi təqdim edən Toğrul Adıgözəlov “komissiya üzvü” olduğunu deyərək, onların 2012-ci ilin may ayında baş verən zəlzələ zamanı zərər görmüş evlərinin tikiləcəyinə söz verərək külli miqdarda pullarını mənimsəyib.

1966-cı il təvəllüdlü T.Adıgözəlov Naxçıvan Muxtar Respublikasında anadan olub. O, tutulana qədər Bakı şəhərində yaşayıb.

Zaqatala RPŞ-nin Bakı şəhərində həyata keçirdikləri əməliyyat axtarış tədbirləri nəticəsində Adıgözəlov Toğrul Rza oğlu tutularaq istintaqa cəlb edilib. Keçirilən əməliyyat tədbirləri nəticəsində Toğrul Adıgözəlovun Qax rayonundan 22 nəfərin, Zaqatala rayonundan isə 17 nəfərin hər birindən 1500-8000 manat aralığında pullarını dələduzluq yolu ilə mənimsədiyi məlum olub.

Faktla bağlı Zaqatala RPŞ-nin İstintaq Bölməsində Cinayət Məcəlləsinin 178.3.2-ci (dələduzluq) maddəsi ilə cinayət işi başlanıb.

Şəki Ağır Cinayətlər Məhkəməsinin 2017-ci il 21 avqust tarixli hökmü ilə Toğrul Adıgözəlov 9 il 6 ay müddətinə azadlıqdan məhrum edilib.