Kürdəmir və Şəkidə yol-nəqliyyat hadisəsi baş verib. Nəticədə 1 nəfər dünyasını dəyişib, 5 nəfər xəsarət alıb.

Bu gün saat 09:00 radələrində Kürdəmir rayon mərkəzində, Aşıq Şakir və İsmət Qayıbov küçələrinin kəsişməsində yol qəzası baş verib. Kürdəmir rayon sakini 54 yaşlı Rövşən Həmidov idarə etdiyi "VAZ 2107" markalı avtomaşınla Aşıq Şakir küçəsində hərəkətdə olarkən qəfildən səhhəti pisləşib. Bu zaman o, idarəetməni itirərək maşını 2 küçənin kəsişməsindəki yaşayış evinin qapısına çırpıb. Nəticədə sürücü hadisə yerində dünyasını dəyişib. Onun oğlu, 27 yaşlı Fərid Həmidov və gəlini, 23 yaşlı Aytac Həmidova yaralanıblar. Onlar Kürdəmir Rayon Mərkəzi Xəstəxanasının travmatologiya şöbəsinə yerləşdiriliblər.
Şəkidə də avtomobil qəzası qeydə alınılb. Şəhərin Bəxtiyar Vahabzadə küçəsində baş verən hadisə zamanı 25 yaşlı Əldost Əhmədlinin idarə etdiyi "Mercedes" markalı avtomobil 26 yaşlı Vüqar Qüvvətovun idarə etdiyi "VAZ 2110" markalı avtomobillə toqquşub. Nəticədə hər iki sürücü, eləcə də "VAZ 2110"-un sərnişini, 18 yaşlı Pərvanə Mürsəlli müxtəlif bədən xəsarətləri alıblar. Hadisə yerinə Fövqəladə Hallar Nazirliyinin yerli qurumunun xilasediciləri cəlb edilib. Avtomobildə sıxışmış vəziyyətdə qalan Vüqar Qüvvətovu oradan çıxarmaq mümkün olub.

Qəzanın dəqiq səbəbləri məlum deyil.

Baş verən hər iki faktla bağlı araşdırmalar aparılır.