Yasamal Rayon Məhkəməsində Universitet müəllimi olmuş şəxsin məhkəməsi başlayır.
“Ölkə.Az”ın məlumatına görə, cinayət məcəlləsinin 178.2.1-ci (dələduzluq; qabaqcadan əlbir olan bir qrup şəxs tətədindən törədildikdə) maddəsi ilə təqsirləndirilən Yusifov Nəbi Qənbər oğlunun məhkəmə prosesinə hakim Ramin Qurbanov sədrlik edəcək.

Qeyd edək ki, cinayət işində Hacıyev Eldəniz Elxan oğlu və Qafarov Zaur Ələsgər oğlu tanınıb.
Araşdırmalarımız zamanı məlum olub ki, 64 yaşlı Nəbi Yusifov Gəncə şəhərində Yeni Azərbaycan Partiyasının yaradıcılarından biridir, həmçinin YAP Gəncə şəhər Təşkilatı İdarə Heyətinin üzvüdür. N.Yusifov 1993-cü ildən Azərbaycan Dövlət Aqrar Universitetindən baş müəllim kimi fəaliyyət göstərib.

Belə ki, 2016-cı ildə Nəbi Yusifovun adı saxta diplom satmaqda hallanıb. Şikayətçinin bildirdiyinə görə, 2011-ci ildə Nemətzadə Əmrah Əmirulla oğlunu kollecə düzəltmək üçün Aqrar Universitetin baş müəllimi və rektorun yaxın adamı kimi tanınan Nəbi Yusifov onlardan 9 illik təhsil şəhadətnaməsini, 4000 ABŞ dollar pul alıb və işi qanuni səviyyədə həll edəcəyinə söz verib. Bir müddət sonra guya kollecə qəbul olmuş tələbənin tələbə biletini gətirib. Hətta tələbəyə arayış lazım olanda belə vaxtl-vaxtında verib. Qanuna görə Nemətzadə Əmrah 2014-cü ildə kolleci bitirməli olduğu halda, 3 ildən sonra yəni 2016-cı ildə Aqrar Universitetin baş müəllimi Nəbi Yusifov diplomu sahibinə təqdim edib. Diplomun görünüşü və gec verilməsi valideyində şübhə yaratdığı üçün lazım olan adamlarla əlaqə saxlayıb. Məlum olub ki, verilən diplom saxtadır.

1 il qabaq isə adı saxta diplom qalmaqalında hallandığına görə, Azərbaycan Dövlət Aqrar Universitetindən tutduğu baş müəllim vəzifəsindən azad olunub.