Bakı Ağır Cinayətlər məhkəməsində 1992-ci ildə Ağcabədi rayonunun İcra Hakimiyyətinin başçısı vəzifəsində çalışan Münsif Məmməd oğlu Səfərov və Rüstəm Ərəstun oğlu Bayramovun məhkəmə prosesi davam etdirilib.
Hakim Mirzə Xankişiyevin sədrliyi ilə keçirilən prosesdə prokuror Fəhmin Hümbətov çıxış edib. Prokuror təqsirləndirilən şəxslərin cinayətinin məhkəmə istintaqı zamanı tam sübuta yetirildiyini deyib.

Prokuror M. Səfərovun 8 il müddətinə azadlıqdan məhrum edilməsini və barəsində seçilən qətimkan tədbirinin həbs qətimkan tədbiri ilə əvəz olunmasını, məhkəmə zalında həbs edilməsini istəyib.
F. Hümbətov R. Bayramovun da 8 il müddətinə azadlıqdan məhrum edilməsini istəyib.
Proses iyunun 13-də davam etdiriləcək.

Qeyd edək ki, təqsirləndirilən şəxslər Fərabi Mənsur adlı şəxsin evini dələduzluq yolu ilə ələ keçirərək bankdan küllü miqdarda pul götürüblər.
İttİham aktına görə, onlar Fərabi Mənsura 60 min manat ziyan vurublar və hər iki şəxsə qarşı Cinayət Məcəlləsinin 178.3.2-ci (dələduzluq; küllü miqdarda törədildikdə) maddəsi ilə cinayət işi başlanıb.

R. Bayramov barəsində həbs qətimkan tədbiri seçilsə də, M. Səfərov haqqında başqa yerə getməmə haqqında iltizam qətimkan tədbiri seçilib.