"Cəlilabadda dondurma yediyi üçün öldüyü ehtimal olunan 2 yaşlı uşaq əslində həkim səhlənkarlığının qurbanı olub".

Bu barədə Təcili Tibbi Yardım Stansiyasının həkimi Şahvələd Məmmədov bildirib.

Onun sözlərinə görə, körpənin yaxınları onun xəstəxanada keçindiyini deyiblər, həkimlər isə məsuliyyəti boyunlarından atmaq üçün onun xəstəxanaya gətirilərkən yolda öldüyünü iddia edirlər.

Şahvələd Məmmədovun sözlərinə görə, antibiotikin dozası artıq olanda uşaqlarda yan təsir göstərir və şok yaradır:

"Uşaqlara antibiotik vurmazdan əvvəl mütləq "prob” qoyulmalıdır. Həm də 2 yaşında uşağın öz dozası var. Onlara 1 qram yox, 0,5 qram antibiotik vurulmalıdır. Əks halda uşaqlarda ildırımsürətli anaflaktik reaksiya gedib. Uşağın ölümündə "smes”in heç bir rolu yoxdur. Nə də yediyi dondurmadan zəhərlənib. Uşaq məhz həkim məsuliyyətsizliyi səbəbindən şok keçirib. Antibiotik vurulduqdan sonra uşağı titrətmə tutub, dişlərini qıcamağa başlayıbsa, deməli bədən temperaturu və təzyiqi aşağı düşüb. Bu cür hallarda uşaq mütləq həkim nəzarətində olmalı və reanimasiyon tədbirlər nəticəsində uşağı həyata qaytarmaq mümkün olardı”.

Həkimin qənaətincə, antibiotikləri necə gəldi istifadə etmək olmaz. Bu dərmanların təyinatı konkret hədəf üçün olmalıdır:

"Antibiotik ancaq konkret olaraq infeksiya tərəfindən törədilmiş iltihabi prosesə aiddir. Əgər problem iltihabi mənşəlidirsə, o zaman antibiotikdən istifadə olunur.Göstəriş olanda 3 -6 aylıq uşağa da antibiotik vurmaq olar.

Xüsusən də pnevmaniya, sətəlcəm olan uşaqlara antibiotik təyin edilir. Ya da ki, xəstəlik uzun müddət ərzində müalicəyə tabe olmadıqda. Yeri gəldi- gəlmədi körpə uşaqlara antibiotik təyin etmək doğru deyil. Qıc vəziyyətində olan uşağa telefon vasitəsilə "smes” vur, düzələck demək səhlənkarlıqdır. O uşaq mütləq ciddi müayinə edilməli və şok vəziyyətindən çıxarılmalı idi”.

Mütəxəssislər hesab edir ki, antibiotiklər anaflaktik reaksiyadan əlavə uşaqların normal florasında olan bakteriyaların müqavimət qazanmasına səbəb olur. Uşaqda bu bakteriyalardan qaynaqlı bir xəstəlik ortaya çıxdığında həqiqətən lazımlı olan antibiotiklər, bakteriyaların müqaviməti üzündən kifayət qədər təsiri göstərə bilmir. Bu vəziyyətdə doza artımıı lazım olur. Dərmanlar ümumiyyətlə, böyrəklər və qaraciyər tərəfindən xaric edilir. Antibiotikləri davamlı və yüksək dozada istifadələri sonunda qaraciyər və böyrək funksiyaları mənfi təsirlənə bilər. Antibiotiklər xəstəliyə görə uyğun vaxtlarda uyğun dozalarda istifadə edilməlidir. Məsələn, sidik yolu infeksiyaları üçün verilmiş bir antibiotik həkimlə məsləhətləşmədən boğaz infeksiyası üçün istifadə edilməməlidir. 3 aydan böyük körpələrdə bir-iki gün yaşanan, qızdırma salıcı dərmanlarla aşağı salına bilinən 37,5-38 dərəcə arası qızdırma üçün dərhal antibiotik verilməməlidir. Bu vəziyyətdəki 3 aydan böyük körpələrin ümumi vəziyyətində və qidalanmasında bir çətinlik yoxsa, narahat olmamaq, qızdırmanı salaraq gözləmək lazımdır.

Qeyd edək ki, mayın 2-də, 2016-ci il təvəllüdlü Əli Allahverdi oğlu İsmayılovun dondurma yedikdən sonra boğazı şişib. O, halsızlıq və yüksək temperaturla Cəlilabad Diaqnostika Mərkəzinə çatdırılıb. Körpəyə ilkin tibbi yardım göstərilib və o, evə buraxılıb. Lakin bu gün körpənin yenidən halı pisləşib və yaxınları onu Cəlilabad Uşaq Xəstəxanasına aparıb. Xəstəxanada uşağın öldüyü məlum olub.
Uşağın atası Allahverdi İsmayılov isə oğluna vurulan antibiotikdən sonra onun vəziyyətinin daha da ağırlaşdığını qeyd edib.

///Şərq.az