Dekabrın 30-da Rusiyanın paytaxtı Moskva şəhərindən Azərbaycanın paytaxtı Bakı şəhərinə uçan sərnişin təyyarəsi Rusiyanın Volqoqrad şəhərində məcburi eniş edib.
“Ölkə.Az” xəbər verir ki, bu barədə uçuşu həyata keçirən “Aeroflot” şirkəti məlumat yayıb. Verilən məlumata görə, dekabrın 30-da Rusiya vaxtı ilə saat 12:48-də “Boeing-737” sərnişin təyyarəsi Volqoqradda məcburi eniş etməli olub. Buna səbəb sərnişinlərdən birinin səhhətinin qəfil pisləşməsi olub.

“Təyyarə havaya qalxandan bir neçə dəqiqə sonra sərnişinlərdən birinin vəziyyəti pisləşib. Onu özünə gətirmək istəsələr də bu alınmayıb. Bu barədə pilota məlumat verilib. Pilot təyyarəni Volqoqradda təcili endirməyə məcbur olub”, - deyə məlumatda bildirilib.
Volqoqrad aeroportunda endirilən təyyarədəki sərnişinlər yaxınlıqdakı qonaq evinə aparılıblar. Halı pisləşən sərnişinə təcili tibbi yardım həkimi ilkin tibbi yardım göstərib və onu xəstəxanaya aparıblar. Sonradan təyyarə yenidən uçuşu həyata keçirib. Onun Bakıya istiqamət aldığı bildirilib.