Bakıda yataqxanada, Qazaxda isə fərdi evdə yanğın hadisəsi baş verib. Xoşbəxtlikdən hadisələrdə xəsarət alan olmayıb. Qubada da yanğın olub. Amma bu dəfə meşə massivi yanıb.

Bakının Yasamal rayonunda yataqxanalardan birində yanğın baş verib. Məcburi köçkünlərin məskunlaşdığı beşmərtəbəli yataqxana binasının 1-ci mərtəbəsində ümumi sahəsi 70 kvadratmetr olan 4 otaqlı mənzilin 1 otağının yanar konstruksiyaları, ev əşyaları 12 kvadratmetr sahədə yanıb. Yüksək temperatur digər evlərə də təsir edib. Hadisə yerinə cəlb olunan yanğınsöndürənlər tərəfindən alovun qarşısını almaq mümkün olub və digər otaqlar yanğından mühafizə edilib.
Qazaxda da vətəndaşa məxsus evdə yanğın qeydə alınıb. İkimərtəbəli yaşayış binasının 2-ci mərtəbəsində vətəndaşa məxsus ümumi sahəsi 26 kv.m olan 2 otaqlı mənzilin dam örtüyünün yanar konstruksiyaları tamami ilə yanıb. Yanğın yerinə gələn FHN-nin canlı qüvvəsi və texnikasının köməkliyi ilə alovun qarşısını almaq mümkün olub. İlkin ehtimala görə, hadisəyə səbəb elektrik naqillərində yaranan qısaqapanma olub.
Axşam saatlarında isə Quba rayonunun Qımıl kəndi ərazisində meşə massivində yanğın baş verib. Hadisə yerinə Quba Dövlət Yanğından Mühafizə hissəsinin canlı qüvvəsi və texnikası cəlb olunub. Ümumilikdə bir hektar ərazi yanıb. Meşə sahəsinin qalan hissəsi yanğından mühafizə olunub. Analoji hadisə Quba rayonun daha iki kəndində olub. İkinci Nügədi kəndi ərazisində 2 hektar, Tülər kəndi ərazisində isə 3 hektar sahə yanıb.

Baş verən yanğınların səbəbləri araşdırılır.

http://kepeztv.az