"Baxın, icra hakimiyyəti bizi necə vəziyyətə salıb. Taxtadan olan evimizi təmir etmək adıyla sökdü, sonra da "büdcədə pul yoxdur” deyib işləri yarımçıq qoydu. 6 aydan çoxdur ki, evdə ilanlar mələşir, yağış başımıza yağır, məcbur oluram ki, azyaşlı qızımla çıxıb çöldə yatım”.

Bunu Meydan TV-yə Zabrat qəsəbəsinin sakini Semnara Məmmədova deyir.



Semnara Məmmədova Sabunçu rayonu, Zabrat qəsəbəsi, Barat Şəkinski küçəsində yaşayır. Onun sözlərinə görə, illərdir ki, bir hissəsi taxta konstruksiyalı, kiçik, şəraitsiz evdə yaşayırmış. Buna görə dəfələrlə Sabunçu Rayon İcra Hakimiyyətinə müraciət etsə də, qurumdan ona evin təmir-tikintisi üçün vəsait olmadığı bildirilib. Semnara xanım da bir neçə ay əvvəl Prezident Administrasiyasına müraciət edib. Bundan sonra Sabunçu Rayon İcra Hakimiyyəti hərəkətə gəlib və vətəndaşın evinin əsaslı təmirini öz üzərinə götürüb. Ancaq evin taxta konstruksiyalı hissəsini sökəndən sonra vətəndaşa bildirib ki, işi davam etdirməyə pul yoxdur.

İki maşın daş, bir maşın torpaq, 40 kisə sement...

"Mən Prezident Administrasiyasına müraciət edəndə icra hakimiyyətinin bizə göndərdiyi "büdcədə pul yoxdur” məzmunlu məktubunu da əlavə etmişdim. Mənim müraciətimə baxılmışdı və icra hakimiyyətinə məktub göndərilmişdi ki, vətəndaşa kömək edilsin. Bu ilin aprelində icra hakimiyyətinin Zabrat qəsəbəsindəki nümayəndliyindən əlaqə saxlayaraq bildirdilər ki, Prezident Administrasiyasından məktub gəlib, narahat olmayın, evin təmir-tikintisi üçün nə lazımdırsa, edəcəyik. Elə həmin ay iki maşın daş, bir maşın torpaq, 40 kisə sement gətirdilər, dedilər, materiallarla biz təmin edəcəyik, ancaq tikinti işləri üçün özünüz fəhlə tapın. Qonşular köməkləşib evin taxta hissəsini sökdülər, həmin hissəni daşla hördülər. Tikinti materialı tükənəndə icra hakimiyyətinin işçiləri də yoxa çıxdılar”, - şikayətçi deyir.



İcra hakimiyyətinin yarımçıq işi üzündən ailə soyuq qışı yarımtikilidə keçirməli olacaq
Mənbə: Meydan TV

"İşləri yarımçıq saxladılar, dedilər, pul yoxdur”

Semnara Məmmədova deyir, o, sonradan Sabunçu Rayon İcra Hakimiyyətinə dəfələrlə müraciət edib, ancaq qurumdan ona bildirilib ki, işləri davam etdirmək üçün büdcədə pul yoxdur: "Mən də bildirdim ki, əgər sizin edəcəyiniz kömək iki maşın daşdan, bir maşın torpaqdan, 40 kisə sementdən ibarət olacaqdısa, evi niyə söküb yerə qoyurdunuz? Əvvəldən bildirəydiniz biz bura qədər sizə kömək edəcəyik, mən yenidən Prezident Administrasiyasına yazardım ki, icra icra hakimiyyətinin təklifi bizi qane etmir. Bütün yayı açıq havada qaldıq, uşağın yatdığı yataqda dəfələrlə ilan gördük, çölə qaçdıq, evdə gecələməyə qorxduq. İndi evin daş hissəsinə sığınmışıq, ora da yağış yağanda suya qərq olur. Uşağı götürüb, gedib qohum evində qalıram, su çəkiləndə qayıdıram”.

Semnara xanım narahatdır. Semnara xanım narahatdır. Deyir, icra hakimiyyətinin yarımçıq işi üzündən ailə soyuq qışı yarımtikilidə keçirməli olacaq: "Qızım azyaşlıdır, bu vəziyyətə düşəndən uşaq tez-tez xəstələnir. Özüm xəstəyəm, həyat yoldaşım günəmuzd fəhləliklə məşğul olub, gündəlik çörəkpulunu zorla qazanır”.

Semnara Məmmədova 1 ay əvvəl yenə Sabunçu Rayon İcra Hakimiyyətindən şikayət edib, işlərin yarımçıq qalması barədə məktub yazıb. Məktubdan səs çıxmadıqda Prezident Administrasiyasının məktublar şöbəsinə müraciət edib. Ona bildirilib ki, məktub aidiyyəti üzrə Sabunçu Rayon İcra Hakimiyyətinə göndərilib:



"Dedilər, Prezident Administrasiyası ilə öz aramızda nə yazıb-pozacağıqsa, özümüz bilirik"
Mənbə: Meydan TV

"Mən icra hakimiyyətiylə də əlaqə saxladım, bildirdim ki, Prezident Administrasiyasından sizə məktub gəlib, niyə tədbir görmürsünüz? Dedilər, Prezident Administrasiyası ilə öz aramızda nə yazıb-pozacağıqsa, özümüz bilirik. Dedim, zəhmət olmasa Administrasiyaya yazacağınız cavabda vətəndaşa etdiyiniz köməyin iki maşın daş, bir maşın torpaq, 40 kisə sementdən ibarət olduğunu da qeyd edin. Mənə hələ də bir cavab verilmir”.

Sabunçu Rayon İcra Hakimiyyətindən Meydan TV-yə bildirilib ki, qurumun imkanları Sabunçu rayonu ərazisindəki şəhid və qazi ailələrinin mənzil şəraitinin yaxşılaşdırılmasına yönləndirilib. Bununla belə, qurum Semnara Məmmədovanın evinin abadlaşdırılmasına da qismən diqqət ayıra bilib. Gələcəkdə imkan daxilində qurum yenə də köməyini əsirgəməyəcək.