Hər birimizin vətəndaş kimi formalaşmasında ibtidai tərbiyə müəssiələri sayılan uşaq bağçalarının əməyi danılmazdır.

Bir çoxlarımızın cəmiyyətə ilk addımlarımızın məhz bağçadan başlaması, bu sahəni bizlərə doğmalaşdırmaqla yanaşı, həm də aktual olmasından xəbər verir. Hər zaman olduğu kimi, Şirvan bağçalarında qeyri-nizamlılıq hökm sürür. Şirvanlı valideynlərin uşaqlarının tərbiyə məkanı kimi üz tutduqları bağçalar ciddi problemlər girdabında boğulur.

Bizim media operativliyimiz, bu sahədəki problemləri qabarıq şəkildə büruzə veməyə imkan verdiyindən, redaksiyamıza üz tutan valideynlərin sayı gündən-günə çoxalır. Qəzetimizin ötən saylarında əhalinin qarşılaşdığı bəzi neqativ faktları əks etdirdiyimiz bir neçə materialımız, bu sahədə baş verən növbəti mənfi halların üzə çıxmasına təkan verdi. Şirvan şəhəri, 3 nömrəli "Yasəmən" körpələr evi uşaq bağçasında da analoji hal yaşanır. Bağçada azyaşlıların qidalanma rejimi olduqca aşağı səviyyədədir. Dilsiz-ağızsız balacalar, adi gündəlik normal qidalanmaya həsrət qalmaqla yanaşı, tərbiyəçilər tərəfindən müxtəlif cəza metodlarına məruz qalırlar. Uşaqlarının qidalanma rejimindən ciddi narahatlıq keçirən valideynlər, hər gün uşaqlarına müxtəlif ərzaq məmulatları almaq məcburiyyətində qalırlar. Bağçanın müdiri Elmira xanıma gəlincə isə, fəaliyyətinin sırf korrupsiya xarakterli olması ilə yanaşı, sözügedən bağçanın təsərrüfat subyektlərinin (qaz, istilik təchizatı, su,kanalizasiya və s) yararsız olmasına göz yumaraq müəssisənin ərzaq ehtiyatını öz bildiyi kimi istismar edir. Uşaqlara sanki düşmən münasibət bəsləyən Elmira xanım, onların yataq dəstlərinin belə qeyri- normal şəkildə təşkil olunmasına əhəmiyyət vermir, nəticədə zavallı uşaqların bədən nahiyələrində qızartılar müşahidə olunur ki, bu da hər bir valideyndə ciddi narahatlıqlar yaradır. Elmira xanım üzərinə düşən tərbiyəçi metodikasına deyil, sırf ambisiya maraqlarının təmin olunmasına xidmət etməklə, Azərbaycan Respublikasının Qanunvericilik aktlarında nəzərdə tutulmuş qaydalara əməl etmir.. Gələcək Azərbaycan vətəndaşları olan uşaqlarımızın düzgün tərbiyə olunmasına, nitqi inkişafına, danışıq tərzinə və o cümlədən söz ehtiyatı mənbəyini formalaşdırmaq əvəzinə, özünə maddi sərvət toplayaraq sanballı dolaşığa sahib olub. Şəxsi mənafeyini dövlətçilik maraqlarından üstün tutan Elmira xanım şəhər rəhbərliyindən belə çəkinməyərək hər bir valideyndən uşağının müdir olduğu bağçasına qəbulunu təmin etmək üçün nəysə tələb edir.. Verilmədiyi təqdirdə, valideyn müxtəliv bəhanələrlə üzləşir.

Uşaqlar bizim gələcəyimizdir. Gələcəyimiz isə, şübhəsiz ki, hər şeydən önəmlidir. Tərbiyə müəssisəsini bu meyarlarla deyil, ərzaq maxinasiyası və sərt rejimlə idarə edən Elmira xanımlar ibtidai tərbiyə müəssisələrindən tez bir zamanda uzaqlaşdırılmalıdırlar. Çünki hər biri, hansısa ailənin sevinc payı olan körpələr, bizlər üçün ən əziz varlıqlardır..

P.S.Gələn sayımızda Elmira xanımın nəysə tələb etdiyi və həmçinin aylığa oturtduğu zavallı valideynlərin adları açıqlanacaq..