Röya Hüseynova maddi imkansızlıq üzündən həyatla vidalaşır

Tərtər rayonunun Azad Qaraqoyunlu kəndində yaşayan riyaziyyat müəlliməsi Hüseynova Röya Nəbi qızı "Varikoz genişlənmə. Qara ciyər serrozu" diaqnozu ilə ağır xəstədir. Əvvəllər Azad Qaraqoyunlu, Şükür Rəhimov adına tam orta məktəbdə 13 il müəllimə işləməsinə baxmayaraq, səhhəti ilə əlaqədar peşəsindən uzaqlaşdırılıb. Gənc müəllimənin imkanlı şəxslərin yardımına ehtiyacı var. Hazırda maddi durumunun aşağı olması, onun xəstəliyinin müalicəsinə imkan vermir. Röya Hüseynovanın həyatı imkanlı şəxslərin yardımından və həkimlərin şəfalı müalicəsindən asılıdır.
İndiyə qədər aidiyyatı orqanlara etdiyi müraciətləri cavabsız qalan Röya Hüseynova “Azerinfo.az” saytından kömək istəyib. İki azyaşlı övladı olan şikayətçi müəllimə bizim müxbirə müraciət edərək bildirib: “Tərtərdə anadan olmuşam. 1997-ci ildə Süleyman Rəhimov adına Azad Qaraqoyunlu kənd orta məktəbini bitirdim. Həmin il Pedaqoji Universitetin Riyaziyyat fakültəsinə qəbul oldum. Ali məktəbi bitirdikdən sonra ixtisasım üzrə müəllimlik fəaliyyətinə başladım. Ailəliyəm, iki azyaşlı övladım var. Yoldaşım ali təhsilli olmasına baxmayaraq, heç yerdə işləmir. 2012-ci il may ayının 19-da qida borumda qəfil baş verən damar partlamasından qanaxma yarandı". Onu da qeyd edək ki, Röya Hüseynovanı ağır vəziyyətdə Bərdə rayonuna aparılsa da, xəstəxanada Bakı və ya Mingəçevirə aparılması məsləhət görülüb. Mingəçevir xəstəxanasının reanimasiya şöbəsinə yerləşdirilib. Lakin, həkimlər Röyanın yaxınlarına bildiriblər ki, evə aparın, yarım saatlıq ömrü qalıb. Yaşadığı evdə artıq yas çadırı belə qurulmuşdu. Amma ailə üzvləri imkansızlıq olsa belə, onu Tərtər Rayon Xəstəxanasının baş həkimi Yaşar Hüseynovun verdiyi təcili tibbi yardım maşını ilə Bakıya götürüblər. Burada qanaxma birtəhər dayandırılıb. Lakin, Miqrqasımov adına Respublika Kliniki Xəstəxanasının reanimasiya şöbəsində 3 gün komada qalıb. Komadan ayılandan sonra 12 gün reanimasiya şöbəsində müalicə olunduqdan sonra şəxsi hesabına M.A.Topçubaşev adına Elmi-Cərrahiyyə Mərkəzinə köçürülərək əməliyyat olunub və yenidən Miqrqasımov adına Respublika Kliniki Xəstəxanasının reanimasiya şöbəsinə yerləşdirilib. Bir müddət müalicədən sonra o rayona qayıdıb. Rayona qayıtdıqdan sonra qızdırması yenə də enməyib. Məcbur olub, borc xərclə İrana aparılıb və şəxsi hesabına orada müalicə olunub"
Şikayətçi hər fəsil dəyişikliyində səhhətinin daha da ağırlaşdığını da söylədi: “Fəsil dəyişdikcə səhhətim ağırlaşır. Xüsusilə, payız fəslində. Müalicə olunmağa isə, imkanım yoxdur. 2014-cü ildə yenidən xəstəxanaya düşdüm və həmin il işimdən azad olundum. Bu mənim üçün həyatda aldığım ən ağır zərbə idi. İndiyə qədər 23 dəfə İranda, bir dəfə də İstanbulda müalicəyə görə olmuşam. Müalicələrin xeyri yoxdur, artıq imkanımız da bitib. Aldığım təhsil mənə kömək etmədi. Rayonun Təhsil Şöbəsinin keçmiş müdiri Aydın Qarayevə müraciət etdim. Kömək etmədi mənə. Dərslərim tamam bölündü. Həyatda çox acılar yaşamışam. 2011-ci ildə 33 yaşlı qardaşımı, bir ay əvvəl isə, anamı itirdim. Bu hadisələr də səhhətimə ciddi təsir etdi”.
Şikayətçi müəllimə həmkəndlisi ATV-də qabaqlar nümayiş olunan “Öz Aramızda” verilişinin aparıcısı Zaur Baxşəliyevə də müraciət etdiyini, lakin onun kömək etmədiyini qeyd etdi, həmkəndlisi Röya xanıma cavab verib ki: "Səhiyyə Nazirliyinin qərarına əsasən bizim verilişə qara ciyər serrozu diaqnozlu xəstə çıxarılmır". Bu məsələ ilə əlaqədar Röya xanım Səhiyyə Nazirliyinə müraciət edib və orda bildiriblər kin "Biz bu verilişə belə qadağa qoymamışıq". Tərtər rayonundan olan indiki deputatlığa namizəd Könül Quliyevə Röya xanıma dayaq durub. İndinin özündə də imkanı daxilində kömək edir.
Röya Hüseynova ölümün bir addımlığında olduğunu bildirdi: “Artıq həyatımın son anlarını yaşayıram. Övladlarımın anasız qalmağını istəmirəm. Amma maddi imkansızlıq ucbatından həyatla vidalaşmaq üzrəyəm. Ciddi müalicəyə ehtiyacım var. İstanbulda müalicəmi davam etdirməliyəm. Xalqımın mərd, imkanlı şəxslərindən kömək gözləyirəm. Hər edilən kömək Allah tərəfindən dəyərləndirilir. İki azyaşlı övladımı anasız qoymayın. Yaşadığımız evdən başqa hər şeyi satmışıq. Uşaqlarım məktəbdə oxuyurlar. Onların belə ehtiyaclarını təmin edə bilmirik. Qızım mənə baxdığı üçün dərsə də getmir. Rayonun Təhsil Şöbəsinin Həmkarıar İttifaqı bir dəfə də olsun ki, mənimlə maraqlanmadı və kömək etmədi. Müəllimlikdən azad olundum, amma yardım etmədilər”.
Qeyd edək ki, Röya xanım Prezidentimiz İlham Əliyevə və birinci xanım Mehriban Əliyevaya müraciət etdi: “Hörmətli cənab prezident İlham Əliyev və ölkənin birinci xanımı Mehriban Əliyeva, ümidim yalnız Sizədir. Sizlərin müəllim adına verdiyiniz dəyər hamımıza məlumdur. İnanıram ki, səhhətim barədə də xəbərdar olsanız, mənə yardım edəcəksiz. İşimi davam etdirmək, xalqımın övladlarına savad bəxş etmək istəyirəm”.













Sonda xəstə müəlliməyə kömək etmək istəyən insanlar üçün əlaqə telefonunu və bank hesabını təqdim edirik:
077 512 68 04 Röya Hüseynova

Beynəlxalq Bank Tərtər Şöbəsi
4127222232647453 - Kart nömrəsi

Xanlar Cəbrayılzadə