Nəqliyyat naziri Ziya Məmmədovun başı üzərində qara buludlar dolaşmaqdadır.

Bir vaxtlar qılıncının arxası da, qabağı da kəsən nazir hazırda səlahiyyətlərinin çox hissəsini itirmiş vəziyyətdədir. Hətta iş o yerə çatıb ki, Nəqliyyat Nazirliyinin ləğv edilməsi və Ziya Məmmədovun vəzifəsindən xaric edilməsi məsələsi belə gündəmə gəlib. Nazirin qəfildən bir aylıq məzuniyyətə çıxması bu barədə verilən proqnozların özünü doğruldacağını deməyə əsas verir. Ancaq hər halda gəlin hadisələri qabaqlamayaq.

Çünki bundan əvvəl də bir neçə dəfə Ziya Məmmədovun işdən azad ediləcəyi haqda xəbərlər yayılmışdı. Hər dəfə ən son anda nazir kimlərinsə sayəsində postunu qorumağı bacarırdı. Son günlər yayılan məlumatlarda isə bildirilir ki, həm nazir, həm də oğlu Anar Məmmədov gizli şəkildə ölkəni tərk ediblər. Qəribədir ki, hər dəfə Ziya müəllimlə bağlı bu tip xəbərlər mediaya sızdırılanda deputat qardaşı Elton Məmmədov dərhal açıqlama verirdi. Nədənsə bu dəfə biz onun açıqlamalarının şahidi olmadıq. Deməli, nazirin ətrafında cərəyan edən proseslər olduqca ciddidir. Məhz belə bir ərəfədə Nəqliyyat Nazirliyinin mərkəzi aparatında əməlli-başlı canlanma müşahidə edilməkdədir. Redaksiyamıza daxil olan məlumatlara əsasən, nazirin "vurulmasını" fürsət bilən müavini Arif Əsgərov xeyli fəallaşıb: "Onun aktivləşməsi nazir vəzifəsinə keçmək istəyi ilə bağlıdır. Halbuki, bu şəxs Ziya Məmmədovun sayəsində karyera zirvəsində yüksəlməyi bacarıb. Nazirin çətin günlər keçirdiyini görən keçmiş dəmiryolçu ona zərər vurmaq haqda fikirləşir. Nəqliyyat Nazirliyində nazirin yaxın günlərdə vəzifədən azad ediləcəyi barədə söz-söhbətlər yayılıb. Deyilənə görə, bu cür şayiələrin yayılmasının təşkilatçısı məhz Arif Əsgərovdur. O, gizli şəkildə nazirə qarşı kampaniyaya start verib. Bəzi saytlarda nazirlə bağlı gedən tənqidi yazıların sifarişçisi kimi də o göstərilir. Dəqiq faktlar olmadığı üçün bu məsələ barəsində konkret bir şey demək çətindir. Bir şey dəqiqdir ki, yuxarı dairələrin nazirə əvvəlki tək inamı, etibarı qalmayıb". Mənbəmiz onu da vurğuladı ki, Arif Əsgərovdan başqa da Ziya Məmmədovun postuna göz dikənlər var. Həmin şəxslərin kimliyi haqda yaxın günlərdə müfəssəl məlumat verməyə çalışacağıq. Bu arada, əldə etdiyimiz digər bir informasiyaya görə, məzuniyyətdə olan nazir xarici ölkələrdən birində dincəlir: "Deyəsən, bu məmur üçün vəzifədən çıxarılacağı haqda yayılan məlumatların heç bir önəmi yoxdur. Əslində, onun üçün nə önəmi olmalıdır axı? O indiyə kimi işini görüb. Ölkə ərazisində sayı-hesabı bilinməyən obyektləri, mülkləri, imarətləri var. Hara daş atırsan, Ziya Məmmədovun obyektlərinə dəyir. Turizm üçün əlverişli sayılan rayonların əksəriyyətində hektarlarla meşə sahəsini hasarlatdırıb özü üçün istirahət mərkəzləri tikdirib. Onun nəyi yoxdur ki? Bu var-dövlət ona və özündən sonrakı nəslinə ömrünün sonuna kimi bəsdir". Onu da bildirək ki, bu günlərdə istiqlal.az saytı nazirin oğlu Anar Məmmədovun ölkədən qaçması haqda xəbər yayıb. Saytın məlumatında qeyd olunub ki, nazir oğlunun gedişi atası ilə əlaqədar problemlərlə bağlıdır.

Yazı ilə bağlı qarşı tərəfin də mövqeyini dərc etməyə hazırıq.

P.S. Bu məsələlərlə bağlı nəqliyyat naziri Ziya Məmmədovla müsahibəyə zaman istənildi.