Bu günlərdə Sabirabad rayonu, M.H.Şəhriyar adına kənd sakini, 72 yaş həddində çatmış ağsaqqal Əhədov Abuzər Fərrux oğlu, ölkə rəhbəri cənab İlham Əliyevə, Birinci vitse-prezident Mehriban xanım Əliyevaya, Baş Prokuror cənab Zakir Qaralova və digər yüksək çinli vəzifə sahiblərinə yazmış olduğu şikayət ərizəsinin bir surətini, Nyus.az saytının redaksiyasına da təqdim edib. Adı çəkilən bu şəxs redaksiyamıza təqdim etdiyi ərizəsində yazır: “Bir neçə gün bundan öncə 15 nəfər kənd sakini ilə birlikdə Sabirabad rayon İcra Hakimiyyətinin başçısı Siraqəddin Cabbarovun qəbuluna getmişdik. Görüş zamanı icra başçısı bir qədər bizi dinlədi, az sonra üstümə hücum çəkdi, nəlayiq söyüşlər söyüb məni təhqir etdikdə qaçıb zorla onun əlindən çıxa bildim. Siraqəddin Cabbarovun Binəqədi rayonunda 100-lərlə avtobusu var ki, onların hər biri marşrut xətlərində işləyir. İmişli rayonunda asfalt zavodu var. Bu şəxs Bakı şəhərində ayrı-ayrı şəxslərin adına neçə-neçə villa, mənzil və digər daşınan, daşınmaz əmlaklar alıb. Siraqəddin Cabbarov bu gün Sabirabadda Allahlıq iddiasına düşüb. O, İmam Hüseyni lağa qoyub gülür və deyir ki, “ölən də, öldürəndə ərəbdir, biz nə üçün onlara ağlamalıyıq”. İcra başçısı məscidlərə qadağa qoyub, azan verilməsinə imkan vermir. Bir sözlə, bu icra başçısı Prezidentə problem yaradan reketə bənzəyir.
Mən 20 il Quşçuluq Stansiyasının müdiri, kolxoz sədri, kənd sovet sədri, icra nümayəndəsi, 16 il isə poçt şöbəsinin müdiri vəzifələrində işləmişəm. Harada işləmişəmsə hər zaman vicdanım özümə hakim olub. Bu gün mənim heç “su putkam” da yoxdur. Hazırda Siraqəddin Cabbarov rayon sakinlərini vahimədə saxlayır. Məgər indi quldarlıq dövrüdür? İcra başçısı daim vurğulayır ki, “mən “yeraz”am, Prezidentin yerlisiyəm və sizi məhv edəcəyəm”. Mənim az yaşım yoxdur, heç vaxt nə mərhum prezidentimiz Heydər Əliyev, nə də ki, cənab İlham Əliyev ölkəmizi regionlara bölməyib. Bu şəxsin sahib olduğu sərvət 100 min dollarla ölçülür.
Siraqəddin Cabbarov Saatlıda icra başçı olan zaman 84 yaşlı Ağavəli Həsənova məxsus şirkəti buldozerlə darmadağın etdirdi və həmin yerdə Bayraq meydanı inşa olundu. Ondan şikayət edən Ağavəli Həsənova küçədə xəsarət yetirtdirdi və o, dörd gün hüuşsuz qalıb dünyasın dəyişdi. Saatlı Su-Kanal İdarəsinə məxsus boruları satdırıb mənimsədi. İdarənin müdiri guya meşədə özün asıb öldürüb. Əgər belə bir fakt lazımınca araşdırılarsa, o halda bəzi həqiqətlər ortaya çıxar. Bu şəxs “yırtıcı”dır. Əgər onun qəbulunda olduğum zaman qaçmasaydım, bəlkə mənim də taleyim lap pis olardı. İcra başçısının qəbulunda olarkən telefonlarımızı müsadirə etdirdi ki, onun atdıqları addımlarla bağlı heç bir çəkiliş çəkə bilməyək”.
Hörmətli oxucular! Dərc etdiyimiz bu açıqlamada səslənən fikirlər Sabirabad rayonu, M.H.Şəhriyar adına kənd sakini Əhədov Abuzər Fərrux oğluna məxsusdur. İcra başçısı Siraqəddin Cabbarovun ünvanına səslənən belə bir ittihamlarla bağlı bir redaksiya olaraq hələlik konkret nəsə deyə bilməsək də, deyəcəyimiz fikir o olacaq ki, biz bu yöndə araşdırmalarımızı davam etdirəcəyik. Əgər yetərincə təsdiq olunmuş məlumatları əldə edə biləcəyiksə, o halda sizləri baş verən olaylarla bağlı ətraflı məlumatlandırmağa çalışacağıq. Odur ki, bizi izləməyi unutmayın. Qarşı tərəfin də mövqeyini dinləyə bilərik.\\Nyus.Az