Oxu.az xəbər verir ki, Yaponiya hökuməti Rusiyanın daha 80 şirkətinə qarşı ixrac sanksiyalarının tətbiqini təsdiqləyib.

Bu barədə Yaponiya Xarici İşlər Nazirliyinin dərc etdiyi sənəddə deyilir.

Sanksiya siyahısına Miass avtomobil zavodu, “Vımpel” gəmiqayırma zavodu, Amur gəmiqayırma zavodu, “Baykal Electronics” elektronika istehsalçısı, “Strela” istehsalat birliyi kompleksi, “Zvezda” maşınqayırma zavodu və başqaları daxildir.

Yaponiya artıq Rusiyaya qarşı bir neçə sanksiya paketi tətbiq edib, onlardan sonuncusu martın 18-də olub. Həmin sanksiya siyahısına Rusiyadan 15 fiziki və 9 hüquqi şəxs, o cümlədən “Rosneft-Aero”, “Rosoboroneksport”, “Vertolyotı Rossii”, Birləşmiş Aviasiya İnşaat Korporasiyası (OAK), “Uralvaqonzavod” daxil edilib. Bundan əvvəl “Transneft”in rəhbəri Nikolay Tokarev, biznesmenlər Əlişir Usmanov, Gennadi Timçenko, Yevgeni Priqojin və onun ailə üzvləri, Boris Rotenberq və onun oğlu Roman, həmçinin Arkadi Rotenberqin oğlu İqora sanksiya tətbiq edilib.

Bundan başqa, RF Prezidenti Vladimir Putin, Təhlükəsizlik Şurası rəhbərinin müavini Dmitri Medvedev, xarici işlər naziri Sergey Lavrov və başqaları da sanksiyalara məruz qalıblar.

Belə ki, Yaponiyanın sanksiyalar siyahısına artıq Rusiyadan 101 ad və 130 təşkilat daxildir.