Paşinyan Türkiyə ilə danışıqlarda xüsusi nümayəndənin bütün məsuliyyətini öz üzərinə götürüb.

“Siyasi məqsədəuyğunluğu nəzərə alaraq Ruben Rubinyana müvafiq statusun verilməsi qərarını verdim. Ruben Rubinyan mənə, Ermənistanın Təhlükəsizlik Şurasına və ümumilikdə Ermənistan xalqına cavabdehdir”.

Bunu Ermənistanın baş naziri Nikol Paşinyan parlamentdə deputatların sualını cavablandırarkən deyib.

Onun sözlərinə görə, parlamentin vitse-spikeri Ruben Rubinyan baş nazirin qərarı əsasında və siyasi məqsədəuyğunluqdan irəli gələrək Türkiyə ilə danışıqlarda Ermənistanın xüsusi nümayəndəsi təyin edilib.

Buna baxmayaraq, Ermənistan müxalifət blokundan olan deputat Qeqam Manukyan öz sualında israrlı olmaqda davam edib.

“Ruben Rubinyanın təyinatı ilə bağlı yazılı sənəd varmı? Son üç ildəki acı təcrübəmiz göstərdiyi kimi, əgər Allah eləməsin, sabah Ruben Rubinyan ölkə üçün qəbuledilməz və təhlükəli qərar versə, onun təyinatı ilə bağlı Nikol Paşinyan tərəfindən imzalanmış heç bir sənəd olmayacaq”, - deyə deputat deyib.

Paşinyan cavab olaraq bunları deyib: “Nə haqqında danışırsan?! Mən onun əməllərinə görə tam məsuliyyət daşıyacağımı nəzərə alaraq ona bu səlahiyyətləri verdim” - baş nazir vurğulayıb.

Öz növbəsində Ermənistanın xarici işlər naziri Ararat Mirzoyan deputatların suallarını şərh edərkən qeyd edib ki, Rubinyanın heç bir sənədi imzalamaq səlahiyyəti yoxdur.

“Proses qeyd olunan səviyyəyə çatdıqda, məsələ ilə icra hakimiyyəti məşğul olacaq”, - deyə XİN rəhbəri bildirib.