ATƏT-in Minsk qrupunun həmsədr ölkələrinin - Rusiya, ABŞ və Fransanın xarici işlər nazirləri Qarabağ nizamlanması ilə bağlı bəyanat qəbul ediblər. Bu barədə Rusiyanın Xarici işlər naziri Sergey Lavrov deyib. Onun sözlərinə görə, Rusiyanın Qarabağ münaqişəsinin həllindəki vasitəçiliyi Minsk qrupunun həmsədrləri olan ölkələr tərəfindən müsbət qarşılanır və bu məqam bəyanatda da əz əksini tapıb. Məlum olduğu kimi rəsmi Bakı həmsədrlərin fəaliyyətindən narazıdır və bu narazılığı həm 44 günlük müharibə zamanı, həm də müharibədən sonra bir neçə dəfə təkrarlayıb.

Ölkə rəhbəri münaqişənin dinc yolla nizamlanmasında ATƏT-in Minsk qrupunun heç bir rol oynaya bilmədiyini deyib. Ermənistan isə Azərbaycanla sülh danışıqları prosesindən kənarda qalmış Minsk qrupunun vasitəçiliyində israrlıdır. Həmsədrlər də öz növbəsində sərhədlərin delimitasiya və demarkasiyasında yardımlarını təklif edir, tərəfləri onların vasitəçiliyi ilə danışıqlara çağırırlar.

Politoloq Təbriz Musayev “Şərq”ə bildirib ki, 28 il ərzində yeganə fəaliyyəti danışıqlar prosesini uzatmağa və nəticə etibarilə işğal altında olan torpaqlarımızın unudulmasına hesablanmış Minsk qrupunun ən “uğurlu” fəaliyyəti erməni maraqlarının xidmətçisi qismində çıxış etməsidir. Ekspert vurğulayıb ki, həmsədrlər faktiki olaraq BMT Təhlükəsizlik Şurasının məlum Qətnamələrinin icrası prosesini tormozlayırdı:

“Nəticədə Azərbaycan 44 günlük Vətən savaşı ilə həmin qətnamələri təkbaşına icra etdi və imzalanmış üçtərəfli bəyanatla “Dağlıq Qarabağ münaqişəsi” tarixin arxivinə çevrildi. Əgər münaqişə bitib deyiriksə, o halda Minsk qrupunun fəaliyyəti də bitmiş hesab olunmalıdır. Uzun illər ərzində danışıqlar prosesində hər hansı irəliləyişə nail ola bilməyən və ya olmaq istəməyən bir qurumun yenidən proseslərə cəlb olunması arzuolunan deyil. ABŞ və Fransanın məqsədi Rusiyanın ambisiyalarından bir o qədər də fərqlənmir. Hər üç ölkənin niyyəti Cənubi Qafqazda möhkəmlənməkdən ibarətdir”.

Siyasi şərhçiyə görə, nə Rusiyaya, nə də ABŞ və Fransaya Azərbaycanla Ermənistan arasında münasibətlərin normallaşması və sülh sazişinin imzalanması sərf edir:

“Rusiya gərginliyin davam etməsindən istifadə edərək regionda daha da böyük qüvvə ilə möhkəmlənmək istəyir. ABŞ və Fransa isə gərginliyin davam etməsi ilə Moskvanın təkbaşına vasitəçilik missiyasının iflasa uğraması görüntüsünü yaratmağa çalışır. Vaşinqton və Paris düşünür ki, Rusiyanın vasitəçilik missiyası iflasa uğrayacağı halda Ermənistan və erməni cəmiyyəti daha çox anti-Rusiya mövqeyində dayanacaq və etibarsız müttəfiq olaraq Rusiyadan üz döndərəcəklər. Başqa sözlə, digər həmsədr dövlətlərin məqsədi heç də danışıqlar prosesinə qoşulmaqla sülhə nail olmaq deyil.

Tək məqsəd Ermənistandan istifadə edərək Rusiyanı regiondan uzaqlaşdırmaq və Cənubi Qafqazda möhkəmlənməkdir”.