Əfqanıstan böyük hissəsində nəzarəti ələ keçirən Taliban şimaldakı Pəncşir Vadisində müqavimətlə qarşılanıb.

Ölkə.Az xarici KİV-ə istinadla xəbər verir ki, əyalətdə toplaşan qruplaşmaya əfqan-sovet müharibəsinin komandiri, Talibanla Əl-Qaidəyə qarşı mübarizədə məşhurlaşan Şah Məsudun oğlu Əhməd Məsud liderlik edir.

Məsud və tərəfdarları şəxslər yaxın günlərdə Bağlan vilayətinin 3 bölgəsini geri almışdı. Pəncşir vilayətinə yaxın bölgələrdən birində də yerli milislər Talibana qarşı vuruşaraq daha 3 qəsəbədə nəzarəti ələ keçirib.

Əhməd Məsud açıqlamasında Talibanla masaya oturmaq üçün uzlaşmağa ümid etdiklərini deyib. O bildirib ki, danışıqlara getmək üçün Taliban radikal hərəkətlərdən imtina etməlidir.

Onun sözlərinə görə, Taliban bu addımlardan çəkinməsə, əfqan ordusunun sabiq üzvləri və xüsusi dəstəsi mübarizə aparmağa hazırdır.

Taliban isə müzakirələrdən nəticə əldə olunmadığı üçün yüzlərlə döyüşçüsünün Pəncşirə doğru yola çıxdığını açıqlayıb. Açıqlamada qeyd olunub ki, Pəncşirdəki qüvvələr sülh şəraitində təslim olmaqdan imtina etdikləri üçün Taliban üzvləri savaşmaq üzrə yola düşüb.