“Ermənistanda Rusiyaya bel bağlayan qüvvələrin fəllaşması göz önündədir. Onlar neçə müddətdir ki, əhatə dairələrini genişləndirirlər. Aydındır ki, əsas məqsəd İrəvanda hakimiyyəti ələ almaqdır. Ancaq real mənzərə göstərir ki, Ermənistanın indiki hakimiyyəti öz mövqelərini onlara verməməyə çalışır. Başqa sözlə, indiki hakim komanda bütün vasitələrlə hakimiyyəti qoruyub saxlamağa, Rusiyaya meylli qüvvələrə verməmək üçün mübarizə aparır”.

Bunu Reyting.az-a Aydınlar Partiyasının sədri, sabiq deputat Qulamhüseyn Əlibəyli Ermənistanda keçiriləcək parlament seçkilərindən danışarkən deyib.

Q. Əlibəylinin fikrincə, iyunun 20-dən sonra Paşinyan komandası hakimiyyətini qoruyub saxlaya biləcək: “İndiki halda Qərb ölkələri də Nikol Paşinyan hakimiyyətinin qorunub saxlanmasında maraqlıdır. Bu halda Ermənistan Rusiyadan birtərəfli qopmuş hesab oluna bilər”.

Partiya sədri əlavə edib ki, Ermənistanda Paşinyan seçkinin qalibi olacağı təqdirdə Rusiyaya bel bağlayan qüvvələr onun legitimliyini tanımayacaq: “Məncə, bunun əhəmiyyəti olmayacaq. Biz də uzun müddət seçkini tanımadığımızı elan etmişik, amma bu, sadəcə söz olub”.

Siyasətçi əlavə edib ki, Ermənistan üçün qorxulu ssenari terror ehtimalıdır: “Məsələn, 1999-cu ilin oktyabrında Ermənistan parlamentinin sədri də daxil olmaqla bir neçə aparıcı siyasətçi güllələndi. Sonradan 2008-ci ilin martında insanlar küçələrdə öldürüldü. Siyasi terror erməni siyasətinə xasdır. Amma iş orasındadır ki, bunu etməyə hazır olanlar indi müxalifətdədir. Buna rəğmən mən, Ermənistanda siyasi terrorların olacağını istisna etməzdim. Ancaq vətəndaş müharibəsi variantı bir qədər çətindir. Onlarda ayrı-ayrı adam öldürmə və qatillər olsa da, Azərbaycana və Türkiyəyə qarşı birləşməyə çalışırlar. Sabiq prezident Ter-Petrosyan da erməni cəmiyyətinə vətəndaş müharibəsinə dair xəbərdarlıq edib, çəkindirici mesajlar verdi”.