Nasist Almaniyasının lideri Adolf Hitlerin yaxın silahdaşı Henrix Himmlerin qızı 2-ci dünya müharibəsindən sonra Almaniyanın xüsusi xidmət orqanlarında işləyib.
Bu barədə Almaniyanın nüfuzlu “Bild” qəzeti məlumat yazıb. Bildirilir ki, ötən ay Münhen şəhərində 88 yaşında vəfat edən Gudrun Burvitz müharibədən sonra “BND” xarici kəşfiyyat qurumunda işləyib.

Xəbərə əsasən, Burvitz 1961-1963-cü illər arasında Münhen yaxınlığındakı “BND” qərargahında katibə işləyib. O dövrdə quruma nasist hərbi kəşfiyyat komandiri Raynhard Gehlen rəhbərlik edib.
Qurumun tarix departamentinin sədri Bodo Hexelhammer Burvitzin 1963-cü ilə qədər bir neçə ad altında xüsusi xidmət üçün işlədiyini təsdiqləyib. İkinci dünya müharibəsi başa çatanda yeniyetmə olan Gudrun Nürnberq məhkəməsində ifadə verdikdən sonra 1946-cı ildə azadlığa buraxılıb.

Onun SS-in keçmiş üzvlərinə maddi və qanuni dəstək verən gizli “Stille Hilfe” qrupunun da öndə gələn üzvlərindən biri olduğu bilinir. Onun atası, SS komandiri Henrix Himmler 1945-ci ildə ingilislər tərəfindən saxlanıldığı vaxt intihar edib.