Rusiyada yaşayan azərbaycanlı alim, milyarder İqor Aşurbəyli kosmik dövlət qurub.
Yeni dövlətin adı Asqardiyadır.

Aşurbəyli bu barədə bazar ertəsi Vyanada keçirilən rəsmi tədbirdə məlumat verib: “Biz bəyan edə bilərik ki, Asqardiya yarandı”.

Kosmik dövlətin planetimizdə heç bir ərazisi olmasa da, artıq 200 min əhalisi var. Bu insanlar ölkəyə internet vasitəsilə qoşulublar. Bundan başqa Ayda yaşayış məntəqəsinin inşası da planlaşdırılır.

Asqardiyanın bir dövlətin fəaliyyəti üçün lazım olan hər şeyi var: konstitusiya, bayraq, himn, seçilmiş nümayəndələr. Bundan başqa dövlət SOLAR kripto valyutasından istifadə edir. Yerlə əlaqəyə gəldikdə isə, Aşurbəyli bəyan edib ki, ölkəni müstəqil etməyi planlaşdırır.
“Asqardiya yerdəki sistemlərdən asılı olmayan infrastruktura sahib olacaq. Sakinlərimizin inteqrə olunmuş pasportları və portativ qurğuları, kredit kartları və ənənəvi smartfonları olacaq”.
Azərbaycanlı milyarder qeyd edib ki, qlobal internet və Yeri asteroidlərdən qorumaq üçün donanma da yaradacaq. Nəticədə Asqardiya təkcə dövlət yox, bəşəriyyətin inkişafında növbəti mərhələ olacaq: “Kosmik məkan sonsuzdur. Kosmik tədqiqatlar insana ölümsüz olmağa imkan verəcək”.

Kosmik dövlət Skandinaviyanın mifologiyasındakı “Asqard” tanrısının şərəfinə adlandırılıb.