Müxalifət hakimiyyətə gəlsə belə Ermənistan Kollektiv Təhlükəsizlik Müqaviləsi Təşkilatının (KTMT) üzvü qalacaq.
Ermənistan mətbuatına xəbər verir ki, bunu Yerevandakı etiraz hərəkatının lideri Nikol Paşinyan mitinqdə etdiyi çıxışda bildirib.

“Ermənistan KTMT tərkibində qalacaq, buna zamin dururam. Bu Ermənistanın milli maraqlarına cavab verir. Biz bunun üzərində işlər aparacağıq, bu təşkilatın daha effektiv olmasına, Ermənistan və Qarabağın təhlükəsizliyi üçün əlavə zəmanətlər verməsinə nail olmağa çalışacağıq”, - deyə Paşinyan bildirib.
Onun sözlərinə görə, hərəkat Rusiyaya qarşı düşmən mövqeyi tutmayıb və hakimiyyətə gələcəyi təqdirdə ölkəni qeyri-səmərəli avantüradan xilas edəcək.

O, eyni zamanda Ermənistanın Avropa İttifaqı və Avrasiya İqtisadi İttifaqı qarşısında götürdüyü öhdəliklərə sadiq qalacağını bildirib.