Dünyanın ən böyük və populyar sosial şəbəkəsi olan Facebook-un rəhbəri Mark Zukerberq ABŞ Senatındakı dinləmələrdə belə deyib.

Milli.Az Washington Post-a istinadən bildirir ki, 2 milyard istifadəçisi olan Facebook-un banisi və sahibinin Senatda ilk dəfə açıq dinləmələrdə çıxış etməsi, daha doğrusu, ifadə verməsi Britaniyadakı "Cambridge Analytica" şirkətinin 87 milyon nəfərin Facebook-dakı profil məlumatlarını oğurlayaraq satması ilə bağlıdır.

Zukerberq eyni vaxtda Senatın hüquq və ticarət komitələrəninin qarşısında çıxış edib. Facebook-un rəhbərinə suallar vermək istəyən senatorlar və konqresmenlərin sayı çox olduğundan zalda əlavə masalar qoyulmuşdu.

Dinləmələr 5 saat davam etsə də, zaldakı senatorlar və konqresmenlərin fikrincə, Facebook-da yaranmış problemlə bağlı ən azı iki həftəlik araşdırma olmalıdır. Bu müddət senatorlarla konqresmenlərin onları narahat edən sualları Zukeerberqə ünvanlamaları üçün gərəkdir.

ABŞ Konqresində istənilən açıq dinlənmələr adətən bütün istəklilər üçün əlçatandır. Zukerberqin ifadə verdiyi dinləməyə yüzlərlə insan qatılmaq istəmişdi.

Mark Zukerberq çıxışına "Cambridge Analytica" ilə bağlı qalmaqalla bağlı üzr istəməklə başlayıb və yaşananlara görə məsuliyyəti bütünlüklə öz boynuna götürüb.

O, sualları cavablayarkən bildirib ki, Facebook-dan istifadə bundan sonra da pulsuz olacaq.

"Facebook istifadəçilər barədə məlumatları reklam şirkətlərinə satmır. Şirkətlərin müəyyən sifarişləri olanda lazımi auditoriyanı biz müəyyənləşdiririk. Məlumatları reklam şirkətlərinə vermədən reklamı gərəkli insanlara göstərə bilirik", - Zukerberq deyib.

Daha sonra o, etiraf edib ki, internetin tənzimlənməsi çox vacib məsələdir: "Bu səbəbdən də internetin yeni tənzimlənmə qaydalarının həyata keçirlməsi üçün ABŞ Konqresinə bütün gərəkli informasiyaları verəcək, texniki dəstək göstərəcəyik".

Onun sözlərinə görə, hər hansı istifadəçi Facebook-dakı profilini ləğv edərsə, onun barəsindəki bütün məlumatlar arxivdən silinəcək.

"Facebook-un idarəetməsində ən böyük problem istifadəçilər barədə məlumatların sızdırılması yox, Rusiyanın bu sosial şəbəkədəki fəaliyyətinə ləng reaksiya verməyimiz oldu. Hazırda internetdə Rusiya ilə "soyuq savaşdayıq", - bu ilin sonunadək Facebook-da təhlükəsizliyin təminatı departamentində 20 min yeni əməkdaşın çalışacağını vurğulayan M.Zukerberq deyib.