Yerli sakinlər qorxduqlarını, təlaş içində yaşadıqlarını deyirlər.

"Son vaxtlar burada baş verən daşqınlar, sellər, dolu yağması, zəlzələlərin bir səbəbi var. Ulu əcdadımız, nənəmiz adətlərimizə uyğun olaraq, normal qaydada dəfn olunmayıb. Bu səbəbdən insanlarımızın arasında intiharlar da artır. Daha qorxulu hadisələr baş verməmiş onu dəfn etmək gərəkdir".

Rusiyanın Altay bölgəsində yaşayan teles tayfasının rəhbəri Ayak Kine belə deyir.
O, Altay Respublikasının Milli Muzeyində saxlanan, "Altay şahzadəsi" və ya "Ukok şahzadəsi" kimi tanınan qız mumiyasının dəfn olunmasını tələb edir.
Milli.Az Siberian Times-a istinadən bildirir ki, Rusiya Arxeologiya və Etnoqrafiya Muzeyinin əməkdaşı, tarix elmləri doktoru Natalya Polosmakın rəhbərlik etdiyi arxeoloji ekspedisiya 1993-cü ildə Rusiyanın Çin, Qazaxıstan və Monqolustanla sərhədində yerləşən Ukok dağ platosundakı qazıntılar zamanı qız mumiyası tapmışdı.
Skif mumiyası sonradan dünyada "Ukok şahzadəsi", "Altay şahzadəsi" kimi tanındı.
Mumiya pazırık mədəniyyətinə şamil olunur. Alimlər bu mumiyanı 20-ci əsrin ən önəmli arxeoloji tapıntılarından biri sayırlar.
Altayın şərqində, Ukok platosundakı Ak Alaxa məzarlığında aşkarlanmış mumiya təqribən 18 metr diametrə malik kurqanda idi. Kurqan Ak Alaxa çayının vadisində yerləşir.
Tomoqrafik tədqiqatlar zamanı bəlli olub ki, "Ukok şahzadəsi" adlanan bu qız yeniyetməlik illərində osteomielit xəstəliyinə tutulubmuş. 20 yaşında isə o, döş xərçənginə tutulub.

25 yaşlı şaman qız dəfn ediləndən 2500 il sonra onun mumiyası aşkarlanıb.

Yerli sakinlər "Ukok şahzadəsi" üçün kurqan yaradılmasını və onun həmin kurqanda dəfn olunmasını istəyirlər.