Ukrayna parlamenti ölkənin bloklara qoşulmamaq statusunun ləğv olunmasına və NATO-ya üzvlük istiqamətində hazırlıq görülməsinə səs verib.

ANS PRESS-in məlumatına görə, Ukrayna parlamentində keçirilən səsvermədə 303 nəfər leyhinə, 8 nəfər isə əleyhinə səs verib.
Ukraynanın 2010-cu ildə Rusiyanın təzyiqi ilə qəbul etdiyi bloklara qoşulmamaq statusu ölkənin hərbi alyanslara üzv olmasını qadağan edirdi.
Bir neçə gün əvvəl xarici səfirlərə müraciət edən prezident Poroşenko deyib ki, Ukraynanın müstəqillik, ərazi bütövlüyü və suverenlik uğrunda vuruşması onun dünya ilə münasibətlərinin formalaşmasında həlledici faktora çevrilib.
Rusiya isə Ukraynanın NATO ilə yaxınlaşmasının əleyhinə olduğunu gizlətmir. Rusiyanın xarici işlər naziri Sergey Lavrov bu hadisəni əks-nəticə verəcək addım adlandırıb və deyib ki, bu, gərginliyin artmasına səbəb olacaq.
Rusiyanın baş naziri Dmitri Medvedev özünün Facebook səhifəsində yazıb ki, Ukraynanın öz neytrallığını ləğv etməsi mənfi nəticələrə gətirib çıxaracaq.
"Əslində, NATO-ya üzvlük üçün müraciət Ukraynanı potensial olaraq Rusiyanın rəqibinə çevirəcək" � deyə baş nazir bildirib.

Brüsseldə NATO sözçüsü bildirib ki, NATO-ya hər hansı bir üzvlük üçün illər lazım gələ bilər. Ukraynanın isə NATO üzvlüyü üçün nə vaxt müraciət edəcəyi bilinmir və bir çox rəsmilər bunu uzaq perspektiv hesab edirlər.

Qeyd edək ki, bir sıra NATO ölkələri Ukraynanın üzvlük məsələsinə müsbət yanaşırlar.