Azərbaycandan Türkiyəyə uçan hərbi yük təyyarəsinin qəzaya uğraması nəticəsində həlak olan 20 əsgərdən biri Bursa şəhərinin yenigün məhəllə sakini hava pilotu mayor Serdar Uslu olub.

Türkiyə KİV xəbər verir ki, şəhadət xəbəri ailəsinə verilən S.Uslunun həyat yoldaşı Göknur Uslunun hamilə olduğu üzə çıxıb.

Cütlük övladlarını 4 ay sonra qucağına almağa hazırlaşırdı.

Qeyd edək ki, Gürcüstan ərazisində qəzaya uğrayan Türkiyə Hərbi Hava Qüvvələrinə məxsus "C130" tipli hərbi nəqliyyat təyyarəsinin bütün üzvləri (20 nəfər) həlak olub. Təyyarənin qalıqları Xolaqiri monastırının yaxınlığındakı dik yamaclara səpələnib və ilk dəfə yerli sakinlər tərəfindən aşkar edilib.

Bundan başqa Gürcüstanda mümkün aviasiya təhlükəsizliyi pozuntusu ilə bağlı cinayət işi başlanıb. İşlər Türkiyə və Azərbaycanın birbaşa dəstəyi ilə koordinasiyalı şəkildə həyata keçirilir.