Naxçıvan şəhərindəki çoxmərtəbəli binalara içməli suyun verilməsində problemlər yaranıb. Sakinlərin bildirdiyinə görə, susuzluq problemini əsasən həftə sonları yaşayırlar. Onlar iddi edir ki, buna onlara verilməli suyun məmur villalarına və yaşıllıqlara ötürülməsidir.
Naxçıvan şəhər H.Əliyev prospektindəki 37-ci binada yaşayan Faxrəddin Baxşəliyev deyir ki, digər günlərdə isə, təzyiq aşağı olduğu üçün, su fasilələrlə verilir:
“Həftəni 5-ci günlərindən başlayaraq su su kəsilir. Digər günlərdə də təzyiq aşağı olduğu üçün binanın 6-9-cu mərtəbələrinə su qalxmır. Çünki, içməli sudan bağların, parkların, yaşıllıqların, varlıların həyətyanı sahələrinin suvarılmasında istifadə edirlər. Biz isə məcbur qalıb, ehtiyacımızı ödəmək üçün suyu əlimizdə daşıyırıq. Əldə su daşımaqla isə problemi həll etmək nünkün deyil. Şikayətimizə isə baxan yoxdur”.
Narazı sakin deyir ki, şikayət etdikləri qurumlar onlara söz versələr də, problemi həllini tapmayıb:
“Iki ay əvvəl Ali Məclisə şikayətə getdik, müavinlərdən biri bizi qəbul edib, dinlədi. Şəhər icra başçısına və su idarəsinin müdirinə problemin həlli ilə bağlı tapşırıq verdi. İki ay keçməsinə baxmayaraq problem hələ də həllini tapmayıb. Demək, bizi başlarından ediblər“.
Qoçüstü məhəlləsində yaşayan Şirin Cəfərov da son günlər suyun verilməsində problemlərin olduğundan şikayətlənib:
“9-cu mərtəbədä yaşayıram. Son günlər su o qədər zəifləyib ki, hətta nasosla belə yuxarı mərtəbələrə su götürmək mümkün deyil. İçməli suyun verilməsində tez-tez fasilələr yaranır. Su veriləndə də təzyiq o qədər aşağı olur ki, yuxarı mərtəbələrə qalxmır. Qalxanda belə qızdırıcı işləmir. İsti sudan istifadə etmək olmur.”
Naxçıvan şəhər İcra Hakimiyyətindən sakinlərin şikayətinə münasibət bildirmək istəmədilər. //gundelik naxcivan//