Naxçıvan Mərkəzi Xəstəxanasında müalicə alan xəstələrə çarpayıların 80 manata satıldığı iddia edilir.
Bu barədə sakinlər “Gündəlik Naxçıvan”a müraciətləri zamanı bildiriblər. Sədərək rayon sakini Şükür Cavadov deyir ki, bu yaxınlarda sözügedən xəstəxanada əməliyyat olunub. Onun sözlərinə görə, həkimlər sağalana kimi xəstəxanada qalmalı olduğunu bildirsələr də, hazırda palatalarda yer olmadığını deyiblər:
"Dedilər, yerimiz yoxdur, ancaq 80 manat versən, ayrıca otaqda çarpayı düzəldə bilərik. Məcbur qalıb dedikləri pulu verdim, mənə dərhal yer tapıldı. Sığortam ola-ola, əməliyyata da məndən 350 manat rüşvət almışdılar".
Culfa rayonundan olan digər şikayətçi Teymur Vəliyev də çarpayı üçün pul ödədiyini iddia edir:
"Kor bağırsağımdan əməliyyat olunmuşdum. Sığortam olsa da, həkimlər məndən 300 manat rüşvət aldılar. Lakin, sağalana kimi xəstəxanada qalmaq, ondan da baha başa gəldi. Dedilər yer yoxdur, ancaq 80 manat versən, təkadamlıq palatada saxlaya bilərik. 5 gün xəstəxanada yatdım. Demək olar ki, hər dəfə növbə əvəzlənəndə sarğını dəyişən, iynə vuran tibb bacısına, palatanı silib-süpürənə hörmət etməli olurdum. Bir əməliyyat üçün ümumilikdə 800 manat xərcim çıxdı".
Naxçıvan Mərkəzi Xəstəxanasının adının çəkilməsini istəməyən əməkdaşı şikayətlərin əsassız olduğunu bildirdi.