“İntihar edən qazi Elvin Cəfərov əvvəlki dövrlərdə dəfələrlə qəbulumda olub. Nə vaxt gəlibsə, qəbul etmişəm. Son zamanlar ondan xəbərim olmayıb. Elvin Cəfərovun nə tələbi olubsa, hamısı həyata keçirilib, qayğı ilə əhatə olunan qazilərdən biri olub”.

TEREF-ın pravda.az-a istinadən xəbərinə görə, bunu Sabirabad Rayon İcra Hakimiyyətinin başçısı Siraqəddin Cabbarov deyib.

S.Cabbarovun sözlərinə görə, E.Cəfərov ictimai işlərə cəlb olunubmuş: “Mənzil növbəsində idi. Üzərində iş gedir...”

O bildirib ki, qazi özünü icra hakimiyyətinin inzibati binasının deyil, Mədəniyyət Evinin qarşısında yandırıb: “Məsələ ilə hüquq mühafizə orqanları məşğuldur. Özünü niyə yandırdığı araşdırmadan sonra bilinəcək. O, Maştağada dispanserdə qeydiyyatda olub, intihar etməsi dövlətin diqqətsizliyi ucbatından olmayıb. Bunu siyasiləşdirmək düzgün deyil”.

DİA.AZ-dan: Çox istərdik ki, icra başçısı Siraqəddin Cabbarova inanaq. Amma bu Sabirabadda ilk qazi intiharı faktı deyil axı... Elə keçən ay Vətən müharibəsi qazisi Manafov Maşallah Gülağa oğlu Sabirabadda intihar edərək canına qıymışdı. Həmin vaxtı da icra hakimiyyəti anoloji izahatı vermişdi...

Hər halda bu məqama "yuxarılar" nəzər yetirməlidir. Siraqəddin Cabbarov işini bacarmırsa, layiq olduğu ünvana göndərilməlidir... Daha nazı ilə oynamağa nə hacət...