Bu küçənin yolları ona görə çəkilmir ki, ordan icra başçısının qazancı yoxdur…

Beyləqan rayonunda icra başçısı Asif Ağayevin korruptiv maraqlarının təmin olunmadığı, ona haram qazanc vəd etməyən heç bir mütərəqqi layihə həyata vəsiqə alıb gerçəkləşə bilməz. Buna ən əyani misal Beyləqanda keçmiş “Yağ – Pendir” Zavodunun ərazisində “SMD-42” kimi tanınan, əsasən məcburi köçkünlərin məskunlaşmış olduğu massivin problemlərini göstərmək olar. Sözügedən massivin yolsuzluq problemi ilə bağlı Realmedia.az saytında iki dəfə videoreportaj paylaşmışdıq. Birinci reportaj yayınlanandan sonra Beyləqan İcra Hakimiyyətinin ərazi nümayəndəliyindən gəlib yerində baxış keçirilmiş, magistral yoldan məhəlləyə qədər 300 metr məsafə təşkil etdiyi və yol çəkilişi üçün təxminən 24 min pul vəsaitinin lazı olduğu təsbit olunmuşdur.



Lakin RİH-nin ərazi nümayəndiliyi bu məsələnin həllinin yerli bələdiyyənin səlahiyyətinə aid olduğunu bildirmişlər ki, bu da qeyd etdiyimiz kimi əksəriyyətini məcburi köçkünlər təşkil edən sakinləri məyus etmişdir. Çünki onlar bilirlər ki, təkcə Dövlət Sosial Müdafiə Fonduna 12 min manat borcu olan bələdiyyənin bu işin öhdəsindən gəlmək üçün daxili imkanı yoxdur. Fərqli olaraq, Rayon İcra Hakimiyyəti problemi həll edə bilər. Axı hər il abadlıq-quruculuq işləri üçün Beyləqan RİH-nin hesabına dövlət yarım milyona yaxın maliyyə vəsaiti ayırır. Bu pulların Asif Ağayev tərəfindən tender maxinasiyaları ilə özünə yaxın firmaların hesabına keçirərək necə “təyinatı üzrə və səmərəli” xərclədiyi barədə indiyədək mətbuatda, eləcə də “Realmedia.az” saytında yetərincə tənqidi məqalələr dərc olunub, yuxarı instansiyalara, Respublika Prokurorluğuna müraciətlər edilib. Doğrudur, icra başçısı məsələnin məsuliyyətini özünün Beyləqan şəhəri üzrə nümayəndəsinin üstünə ata bilər. Di gəl, rayonda uşaqdan-böyüyə hamı bilir ki, başçının qol qoymadığı halda onun şərtləri ödənilmədən heç bir vəzifəli şəxs hər hansı korruptiv əməli gerçəkləşdirə bilməz.



Yeri gəlmişkən, Rayon İcra Hakimiyyətinin sözügedən məsələni həll etməsi üçün başqa bir xərc maddəsi də vardır. Belə ki, hər il büdcədən 100 min manata yaxın vəsait aztəminatlı vətəndaşların ehtiyaclarının qarşılanması üçün ayrılır ki, başçı onu da müxtəlif adlarla “xırıd” eləyir. Bu məsələyə də əlahiddə mövzu kimi əvvəlki yazılarımızda toxunmuşuq. Lakin Asif Ağayevə bu da sərf eləmir. “Problem” budur ki, sözügedən de-fakto massiv de-yure rəsmi ad daşımadığı üçün icra başçısı həmin əraziyə yol çəkilməsi üçün rəsmi tender elan edə bilmir və təbii ki, satınalmalar üzrə işbaz tərəf müqabillərini əməliyyata cəlb edib vəsaiti “pay-püşk” edə bilməyəcək. Başqa sözlə, özünün qazancı olmayacağını bildiyindən, problemin həlli ona cazibədar görünmür. Odur ki, İcra Hakimiyyəti sosial şəbəkə üzərindən də paylaşdığımız həmin məsələyə şərh bölümündə yayındırıcı cavab yazıb. Əlbəttə, buna cavab demək olarsa!.. Beləliklə, RİH bildirib ki, guya sözügedən ərazi – zavodun 2, 2 hektar torpaq sahəsi islahat vaxtı Cəbrayıl rayonundan məcburi köçkün Əliyev Elbrus Əli oğlu tərəfindən qanunvericiliyə uyğun olaraq özəlləşdirilib. Həmin ərazidə və beton kanalın qorunma sahəsində məskunlaşmış köçkünm ailələrinin yaşayış evlərinin hüquqi sənədləri olmadığı üçün qazla təmin etmək mümkün olmayıb. Cavab şərhində həmin evlərin su və kanalizasiya ilə təmin olunması sanki onların boynuna minnət kimi qoyulur. Dolayısı ilə bildirilir ki, eynən qaz təminatının düyünə düşdüyü kimi, yolsuzluq problemi də bürokratik əngəl səbəbindən həll olunmayacaq.
Ancaq məsələ burasındadır ki, Elbrus Əliyev həmin torpağı islahatın getdiyi ötən əsrin 90-cı illərində deyil, 2018-ci ildə ƏMDK-nin (indi ki, adı ƏMDX) məmurları ilə sövdələşərək özününküləşdirib”.



Mövzuya qayıdacağıq.
RealMedia.az
Ramin Məhəmmədoğlu