DogruXeber.az" informasiya agentliyinin redaksiyasına Şəki rayon sakini 57 yaşlı Abdullayev Sakit Şakir oğlu müraciət edib.

Sakit Abdullayev müraciətində bildirir ki, Binəqədi rayon "Zəngəzur" qəsəbəsində aparılan 4 mərtəbəli binanın hazırda davam edən tikintisində 6 gün fəhlə işləyib.

Lakin, artıq orada işləmir.

Səbəb isə onunla bir tikinti obyektində çalışan digər fəhlənin ustası Aydın İlə dava etməsidir.

Sakit Abdullayev redaksiyamıza təqdim etdiyi şikayət ərizəsində qeyd edir ki, usta Aydın öz fəhləsinə deyil, Sakit Abdullayevə "Dur, mənə palçıq gətir" deməsi, ona acıq gedib.

A.Sakit gətirməyəcəyini, onun öz fəhləsinə tapşırıq verməli olduğunu dedikdə, usta onun atasına söyərək, təhqir edib və boynunun arxasından zərbə endirib.

Bu barədə Sakit Abdullayev sözügedən tikintidə prorab olan Füzuli adlı şəxsə və həmin ərazi üzrə polis bölməsinə şikayət edib.

Sakit Abdullayev iddia edir ki: - "Polis tikintinin rəhbəri ilə əlbir olub, məni hadisədən bir neçə gün keçdikdən sonra ekspertizaya göndərdi. Ovaxta qədər artıq ustanın vurduğu zərbənin yeri sağalmaq üzrə olduğundan ekspertiza rəyində zərbənin yüngül olduğu qeyd edilib".

S.Abdullayev isə buna etiraz edib və dəymiş ziyanı ödəmələrini tələb edib.

Çalışdığı tikinti obyekti ona 600 (altı yüz) manat pul təklif edib. S. Abdullayev təklif olunan məbləğ ilə razılaşmayıb.

Bundan sonra, necə deyərlər, "Əli aşından da olub, Vəli aşından da".


S. Abdullayev edaksiyamıza müraciətində bir polisin onun işinə düzgün baxmadığını iddia edir, bir də dəymiş ziyanın 1.000 (min) manat məbləğində olmaqla ona ödənilməsini tələb edir.

Bu Binəqədi rayon "Zəngəzur" qəsəbəsində yerləşən tikinti obyektində baş vermiş hadisədir.

Lakin, sözügedən tikinti obyektində daha böyük proseslər də baş verməkdədir.

Sən demə "öküzün yekəsi pəyədə imiş".

Demək, Sakit Abdullayev orada işə alındığı gündən, işdən kənarlaşdığı günə qədər heç bir əmək müqaviləsi olmadan işləyib. (Həmçinin digər çalışanların da əmək müqaviləsinin olmadığını bildirir.)

Şirkətin tikintidə çalışanları xüsusi geyimlərlə təmin etməməsi, eyni zamanda onların təhlükəsizliyini təmin etməməsi barəsində də məlumat almışıq.

Buradan belə nəticəyə gəlmək olur ki, şirkət işçilərini əmək müqaviləsi bağlamadan çalışdırmaqla həm əmək məcəlləsinin müvafiq maddələrini heçə sayır, həm də dövlətin vergisini ödəməkdən yayınır.

Bütün bunlar barəsində redaksiyamız tərəfindən Dövlət Əmək Müfəttişliyinə və Vergilər Nazirliyinə rəsmi sorğu göndəriləcək.

Nəticələri barəsində isə növbəti yayımlarımızda izləyicilərimizə ətraflı məlumat veriləcək.

P.S: Mövcud məsələ barəsində qarşı tərəfin də mövqeyini dinləmək məqsədilə sözügedən tikinti obyektinin prorabı Fizuli bəylə telefon əlaqəsi saxladıq.

Fizuli bəy biz özümüzü təqdim edib, zəng etmə səbəbimizi bildirən kimi, bizi qabaqlayıb ilk sualı o verdi:

- "Müəllim, siz heç yoxladınız o insanın psixi durumu yerindədir, yoxsa yox?".

Cavabında Fizuli bəyə bunun bizim işimiz olmadığını bildirdik və izah etdik ki, bizim işimiz sadəcə şikayətçinin şikayətini və qarşı tərəfin mövqeyini öyrənib dərc etməkdir. Araşdırma və digər məsələlər hüquq-mühafizə orqanlarının işidir. Bununla bağlı biz aidiyyəti qurumlara rəsmi sorğu göndərəcəyik, onlar lazımi araşdırmalar aparıb, müvafiq tədbirlər görəcəklər.

Fizuli bəy: - "Ay müəllim o adam normal adam deyil. O psixdir. Ona mən dedim gəl 300 manat verək, əl çək bizdən. Cəhənnəm ol get. Ürək bulandırma. O da deyir yox, mənə 1.000 (min) manat ver.
O adamın psixikası normal deyil. Sizin başqa işiniz yoxdur düşmüsünüz bir xəstənin sözüylə ortaya?"

Biz: - " Fizuli bəy, siz bu adamı orada 8 gün əmək müqaviləsi bağlamadan işlətmisiniz..."

Fizuli bəy sözümüzü ağzımızda kəsib:

- "O heç də onu qoy qırağa. Biz indi Sakitin şikayətindən danışırıq".

Qeyd: Fizuli bəyin və onun kimi bir çoxlarının "qırağa qoyduqları" bu məsələ Azərbaycan qanunlarının kobud şəkildə pozulması faktıdır.

Bundan əlavə yüzlərlə, bəlkə də minlərlə tikinti obyektlərində yaşanan qəzalar zamanı ölən və xəsarət alan, bir tikə çörək üçün evindən çıxan insanların qanının batmasıdır.

Bunu onlar dərk etmir. Ya da etmək istəmirlər.

Fizuli bəy əvvəl bizimlə normal şəkildə danışıb, məsələni yerində araşdırmamız üçün həmin obyektə getməmizi xahiş etdi. Biz də cavabında:
"Yaxşı. O zaman biz sabah komanda ilə yaxınlaşarıq"- dedik.

Fizuli bəy bu zaman çox aqressiv şəkildə:

- "Hə, di yığ komandanı gəl. Əl çək. Kiminlə istəyirsən gəl".

Biz:
- "Nə komanda?"

Fizuli bəy: (kinayəli)
- "Demirsən komanda yığıb gələcəm? Mən də deyirəm kimi istəyirsən yığ, gəl. Biz də burda qarşılayacağıq".

Söhbətimizin əvvəlində özünü ali təhsilli mühəndis kimi təqdim edən 60 yaşlı Fizuli bəy bizim aparacağımız çəkiliş komandasını, "söhbətə gedən məhlə uşaqları" zənn etmişdi deyəsən.

Əlqərəz.

Fizuli bəylə söhbətimizdən bir qədər sonra həmin tikintinin rəhbəri Nazim adlı şəxs bizimlə telefon əlaqəsi saxladı və başladı bizə işimizi öyrətməyə ki, "siz əvvəlcə ekspertizadan araşdırın, sonra polisdən".

Biz təkrar Nazim bəyə də izah etdik ki, araşdırmaq üçün aidiyyəti qurumlara rəsmi sorğu göndəriləcək, lazım olan addımlar aidiyyəti qurumlar tərəfindən atılacaqdır.

Əmək müqaviləsi olmadan 8 gün işçi işlətmələrini də Nazim bəy belə izah etdi ki: - "O adam gəldi məndən normal şəkildə iş istədi, mən də götürdüm görüm necə işləyir. Ona görə sənədsiz idi. Mən özümə şəxsi ev tikirəm".

Qeyd: Şikayətçi Sakit Abdullayev inşa edilməkdə olan binanın 5 mərtəbəli iaşə obyekti məqsədli olduğunu deyir.

Tikintinin prorabı Fizuli bəy tikinti şirkətinin adını "Binəqədi park" MMC olduğunu bizə bildirmişdi.

Tikintinin rəhbəri Nazim bəy isə özünə 4 mərtəbəli ev tikdirdiyini bildirir.

Tikintinin özəl olması Əmək Məcəlləsinin müvafıq maddələrini pozmağa əsas vermir. İstənilən halda müqaviləsiz çalışdırmaq, birmənalı şəkildə çalışanların hüquqlarını pozmaqdır.

Daha sonra Nazim bəy onu da qeyd etdi ki, "o insan normal insan deyil. O bu yolla insanları şantaj edib pul qazanır".

İstər prorabın, istərsə də tikinti rəhbərinin gətirdikləri arqumentlərin heç birisi nə onlara, nə də onlar kimi çalışan digər obyektlərə insanların hüquqlarını, dövlətin qanunlarını pozmağa əsas vermir.

Redaksiyamız hər kəsin söz haqqını tanıyır.