“Kəndimizin yaxınlığından keçən kiçik Pirsaat çayı quruyur. Kənd camaatının əkdiyi nar bağları, taxıl sahələri susuzluqdan ziyan çəkir. Təəssüf ki, çayın quruması prosesi neçə ildir davam edirdi və artıq pik həddinə çatıb, ancaq aidiyyəti qurumlar qabaqlayıcı tədbirlər görmür. Nəticədə insanların və mal-qaranın həyatı üçün ciddi susuzluq təhlükəsi yaranıb”.

DİA.AZ xəbər verir ki, Hacıqabulun İkinci Udulu kənd sakinləri kəndin suvarma probleminin xeyli hissəsini həll edən Pirsaat çayının getdikcə qurumasından narahatdılar. Onlar müracidətlərində narahatlıqlarını bildiriblər.

Kəndlilərin sözlərinə görə, kənddə alternativ su mənbələrinin olmaması vəziyyəti daha da ağırlaşdırır: “Məcburiyyət qarşısında yeraltı, mənşəyi məlum olmayan qurunt və şor sulardan istifadə edirik. Bu da torpaqların şoranlaşmasına səbəb olur. Şoran torpaqlarda isə nə əkdiyin bitər, nə də otlaq sahəsi qalar”.
İkinci Udulunun ərazisindən keçən Oğuz-Qəbələ-Bakı su kəmərindən kəndə bir neçə bulaq çəkilib. Ancaq sakinlər deyir, bu bulaqlar əhalinin içməli su tələbatını ödəmir: “İçməli suyu maşınla alırıq. Nar bağlarımızı suvarmağa su tapmırıq. Biz illərdir ki, əsasən narçılıqla məşğuluq, ancaq indi nar bağları susuzluqdan quruyur. Bostan bitkiləri də yetişməmiş quruyub tələf olur. Çünki bostan bitkiləri yalnız şirin suyla suvarılmalıdır”.

Sakinlər bildirirlər ki, qonşu kəndlərlə birlikdə susuzluqdan azı 12 min adam əziyyət çəkir.

Qeyd edək ki, Hacıqabul rayonunun Pirsaat çayı üzərində yerləşən Pirsaat su anbarı daha çox yağış və dağ çaylarının suyu ilə dolur. Rayonun Pirsaat, Rəncbər, Qubalı-Baloğlan, Nəvahi və Atbulaq kəndlərinin 7,4 min hektar əkin sahəsi Pirsaat su anbarına toplanan suyun hesabına suvarılır. Eyni zamanda bu hidroqurğu vasitəsi ilə Pirsaat çayı tənzimlənir və illik atmosfer yağıntıları normadan artıq olduğu zaman ərazini, o cümlədən rayon mərkəzini sel sularından və daşqınlardan mühafizə edir. Ümumi həcmi 17 milyon kubmetr, faydalı həcmi 12 milyon kubmetr olan anbar 1964-cü ildə istifadəyə verilib. 2003-2010-cu illərdə yenidən qurulub. Pirsaat çayında demək olar ki, hər il quruma müşahidə olunur. Hacıqabul Suvarma Sistemləri İdarəsi hər il bunu yağıntıların olmaması, havaların quraq və kəskin isti keçməsi ilə əlaqələndirir. Anbarın su ilə qidalanmaması səbəbindən isə əkin sahələrinin suvarılmasında hər il problemlər yaranır.