Bu günlərdə Salyan rayonu Noxudlu kənd sakini Nəcəfov Nizami Bayram oğlunun sosial şəbəkələrdə müraciəti yayılıb. Müraciətdə ona məxsus torpaq sahəsinin əlindən alındığı iddia edilir.

Modern.az-ın əməkdaşı məsələ ilə bağlı Salyan Rayon İcra Hakimiyyəti ilə əlaqə saxlayıb. Sorğumuza cavab olaraq bildirilib ki, doğrudan da həmin ailəyə məxsus torpaq sahəsi olub. Ancaq 06.07.2018-ci ildə həmin ailə notarial qaydada torpaq sahəsini 30 (otuz) min manat almaqla satıb.

Rəsmi məlumatda o da qeyd edilir ki, Salyan Rayon İcra Hakimiyyəti başçısının 27 fevral 2001-ci il tarixli 36-s saylı sərəncamı ilə qış otlaq sahəsindən 95 hektar ərazi qoyunçuluğun inkişafı üçün 15 il müddətinə “Bayram” kəndli fermer təsərrüfatına icarəyə ayrılıb. İcarə müddəti 2016-ci ilin 27 fevralında başa çatıb.

Müqavilənin başa çatmasına baxmayaraq, yeni icarə müqaviləsi üçün müraciət edilməyib və torpaq sahəsindən qanunsuz olaraq istifadəyə davam edib.

Yalnız 2017-ci ildə rayonda yeni “Aqropark” yaradılarkən təsərrüfat rəhbərliyi müraciət edib. Ancaq “Aqropark”ın yaradılması ilə əlaqədar göstərilən ərazidəki torpaqlar dövlət fonduna geri qaytarılıb.

Bunun əvəzində bütün torpaq icarədarlarına, o cümlədən “Bayram” kəndli fermer təsərrüfatı rəhbərliyinə yeni torpaq sahələri təklif olunub. Ancaq sonradan məlum olub ki, 06 iyul 2018-ci ildə “Bayram” kəndli fermer təsərrüfatı ona məxsus olmayan, ancaq bundan əvvəlki illərdə icarəyə götürdüyü əraziləri və qoyunçuluq üçün nəzərdə tutulan tikililəri 30 (otuz) min manat müqabilində notarial qaydada sataraq oradan çıxıb.

Təəccüblüsü odur ki, “Bayram” kəndli fermer təsərrüfatı ona məxsus olmayan, 15 il üçün icarəyə götürdüyü əraziləri satdığı halda yenidən həmin ərazinin geri qaytarılmasını tələb edib.

Salyan Rayon İcra Hakimiyyətindən bildirilib ki, 1 may 2020-ci ildə şikayətçi Gülsüm Nəcəfovanın qaynı oğlu Nəsəfov Rəhman Elman oğlu icra başçısı tərəfindən qəbul olunub, müraciəti əsasında ona 10 hektar torpaq sahəsi təklif olunub. Lakin qarşı tərəf bundan imtina edib və qohumlarının icarəsində olmuş əvvəlki torpaq sahəsinin ona verilməsini tələb kimi irəli sürüb. Təbii ki, bu da mümkün olmayıb. Çünki bu ərazi o ailə tərəfindən notarial qaydada başqasına satılıb.

Salyan Rayon İcra Hakimiyyəti sosial şəbəkələrdə yayılan məlumatların tam əsassız olduğunu, məsələnin onlara heç bir aidiyyatı olmadığını bildirib. Sonda məsələni təsdiq edən sənəd də təqdim olunub.