Ulu öndər Heydər Əliyevin adını daşıyan park-kompleksində baş tutan tədbir kütləviliyi ilə seçilib.

Gəncə şəhər İcra Hakimiyyəti strukturları və şəhər ictimaiyyətinin nümayəndələri əvvəlcə ümummilli liderin abidəsini ziyarət edib, ulu öndərə ehtiramlarını bildiriblər. Heydər Əliyev Mərkəzində keçirilən Milli Qurtuluş Gününə həsr olunan tədbirdə ümummilli liderin Azərbaycanda hakimiyyətə ikinci dəfə qayıdışı, ölkədə siyasi stabilliyin bərpa olunması və dövlət quruculuğu sahəsində atdığı mühüm addımlardan danışılıb. Bildirilib ki, ulu öndərin 90-cı illərin əvvəlində başlatdığı neft strategiyası respublikanın iqtisadi və siyası cəhətdən yüksəlişinin təməlinə çevrilib. Toplantıda Gəncə hadisələrinə də nəzər salınıb.

Elmar Vəliyev- Gəncə şəhər İH başçısı: "Ulu öndərin 13 iyunda Gəncəyə səfəri hadisələri öz gözü ilə görməsi və burada ziyalılarla görüşdükdən sonra qayıdıb parlament sədri vəzifəsini icra etməsi bu gün bizə imkan verir ki, Azərbaycan inkşaf etsin, dünya birliyində söz sahibi olsun, Avropanın təsis etdiyi ən böyük oyunlara ev sahibliyi etsin".

Tədbirin rəsmi hissəsindən sonra toplantı iştirakçıları Heydər Əliyev Park-Kompleksində 10 hektar sahəni əhatə edən "GəncLand" istirahət və əyləcə məkanının açılış mərasimində də iştirak ediblər. Şəhər rəhbərliyi və ictimaiyyət nümayəndələri ərazidə yaradılan şəraitlə yaxından tanış olub, kafe və restoranlar, eləcə də atraksionların işi ilə maraqlanıblar.

Daha sonra Milli Qurtuluş Gününə həsr olunan tədbir amfiteatrda yerli incəsənət ustalarının hazırladığı konsert proqramı ilə davam edib.

kepeztv.az