Elzanın taleyi əvvəldən qara gəlib. Onun heç kəsi yoxdur. İndi fiziki varlığını qorumaq üçün çarpışır.

Bərdədə daxmaya məskunlaşdığı evin isə nə işığı, nə qazı var. Elzanı dövlətə və xalqa müraciət etməyə məcbur olması artıq işləmək imkanını itirməsidir.

O, özünün də dediyi kimi, heç vaxt kömək istəməzdi. Sadəcə, ağciyər xəstəliyi onun iş qabiliyyətini əlindən alıb və çörək pulu qazana bilmir.

Məsələ tək bu deyil. Elzanın doğurdan da dünyaya göz açdığı gündən bəxti, qisməti qara yazılıbmış.

Onun atası Əhməd kişi vətən uğrunda şəhid olub. Amma bu mötəbər, ali zirvəyə ucalan Əhməd kişinin qızı acınacaqlı vəziyyətdə yaşayır.

Sensasiya TV-yə danışan Elzanın sözlərinə görə, gözünün bircə ağı, qarası anası var. O da 40 ildir ki, ruhi-əsəb dispanserində müalicə alır.

Bütün bu faciələr, dəhşətlər içində tənha qalan Elza xəstəlik tapana qədər birtəhər özünü dolandırırmış. Gah qab yuyurmuş, gah ev təmizləyirmiş.

Ancaq ağciyər xəstəliyinə görə həkimlər ona işləməyi qadağan ediblər. Elzanın qadın kimi də şəxsi həyata qara gəlib. Şəhidin kimsəsiz qızı ana, bacı-qardaş olmadığı üçün məcbur qalıb özündən yaşca xeyli böyük birinə ərə gedib.

Amma o kişi də dünyasını dəyişəndən sonra Elzanın - şəhid Əhmədin övladının bu torpaqda yaşaması üçün heç bir səbəbi qalmayıb. Çünki onun övladı da yoxdur.

İndi yalnız ac qalmamaq və ölməmək uğrunda mübarizə aparan şəhidn balasına heç kəs sahib çıxmır. Onun yaşadığı qaranlıq daxmaya nə işıq çəkilir, nə qaz verilir. Deyir ki, yaşadığı ev qışda buzxana olur: “Yorğan-döşəyə girəndə elə bilirəm suyun içində yaşayıram. Mənim atam sağ olsaydı, belə yaşamazdım. O, xalqın uğrunda canından keçib.

Amma indi qızına heç kəs köməklik eləmir. Hətta ATV-də Zaurun verilişinə də çıxdım, bir nəticəsi olmadı. Sağ olsun, Xəyyam Salmanzadə yardım edir, onun verdiyini də qəpik-qəpik xərcləyirəm ki, sabaha ac qalmayım. Nəinki ət, heç qaynatmağa makaron tapmıram”.

Onun ATV-də və sosial şəbəkələrdə müraciətindən sonra gözlənti vardı ki, Bərdə rayon icra hakimiyyəti başçısı Vidadi İsayev, əmək və əhalinin sosial müdafiəsi naziri Sahil Babayev kömək edəcək.

Eləcə də “Azəriqaz” rəhbərliyi onun evinə qaz verəcək. Lakin şəhid qızı bu amansız həyatla təkbaşına buraxılıb.

“Qab yuyurdum, soyuq suyun içində işləyirdim, heç kəsə müraciət eləmirdim, öz əlim, öz başım idi.

Ağciyərimdən su çəkildiyinə görə məcbur qalmışam ki, xalqa, dövlətə müraciət edim. Bu buzxana evdə oturmuşam. Kaş atam sağ olaydı...”

Elza yenidən xalqa, prezidentə, nazirlərə, Bərdənin və respublikanın xeyirxah insanlarına, iş adamlarına müraciət edib, imdad diləyib:

“Ağciyərimdən zədə almışam, 4 dəfə su çəkmişəm.

Nə reseptimi ala bilirəm, nə iynə vurdura bilirəm. Mən illərdir ki, ət üzünə həsrətəm. Allaha and olsun ki, evin tək qızı olmuşam, kimsəsiz qız idim.

Məni bir qadın ərə verdi, o da rəhmətə gedənə kimi məni əlinin içində saxlayırdı. İşləyirdim, amma həkim indi icazə vermir.

Göydə Allah, yerdə siz, heç kəsim yoxdur, tək ümidim bu dövlətə və xalqadır. Məni özü yerinizə qoyun, bir şəhid övladını xilas edin...”