Siyəzən şəhər sakini Zeynalov Sabir Mabetdin oğlu Siyəzən rayon Məhkəməsinin hakimi Ələkbərov Bəylər Ramiz oğlu və Sumqayıt Apellyasiya Məhkəməsinin hakimi Rzayev Məhəmmədəli Əsəd oğlu barəsində redaksiyamıza şikayət məktubu göndərib.
1993-cü ildən YAP-ın üzvü olduğunu deyən Sabir Zeynalov Yeniavaz.com-a verdiyi açıqlamasında iddia edir ki, sözügedən hakimlər onu haqsız yerə 25 gün azadlıqdan məhrum ediblər: “Siyəzən rayon Məhkəməsinin hakimi Ələkbərov Bəylər Ramiz oğlu 8 yanvar 2019-cu il tarixli qərarı ilə mənə, Azərbaycan Respublikası İnzibati Xətalar Məcəlləsinin 535.1-ci maddəsi ilə inzibati xətanı törətməkdə təqsirli bilərək, 25 gün müddətində həbs təyin edib.
Mənim nəzərdə tutulmuş inzibati xətanı təqsirli olaraq törətməyim sübuta yetirilməmiş, ümumiyyətlə inzibati xəta hadisəsi baş verməmişdir. İşdən yalnız o görünür ki, mənə qarşı polis əməkdaşları tərəfindən süni şəkildə İnzibati xəta hadisəsi görünüşü yaradılaraq nəticədə məhkəmə tərəfindən barəmdə qanunsuz inzibati tənbeh, həbs haqqında qərar qəbul edilib.
Siyəzən rayon məhkəməsinin qərarı son dərəcə qanunsuz və əsassız həmçinin ədalətsiz və qərəzli olduğu üçün, müdafiəçim tərəfindən apellyasiya şikayəti verilmişdir. Biz ailəlikcə ümid edirdik ki, apellyasiya məhkəməsi rayon məhkəməsinin qanunsuzluqlarını düzəldərək haqq ədalət yerini tapacaq. Əfsuslar olsun ki, hakim Məhəmmədəli Rzayev də hakim adına yaraşmayan, haqq-ədalətdən, qanundan uzaq bir mövqe sərgiləyərək qərarı qüvvədə saxladı”.
Sabir Zeynalov iddia edir ki, bütün bunlara səbəb onun rayonda baş verən qanun pozuntuları barədə yuxarı dövlət orqanlarına müraciətlər etməsi olub: “Siyəzən rayon məhkəməsinin hakimi Bəylər Ələkbərov demək olar ki, rayonda ancaq vəzifəli şəxslərin sifarişləri ilə qərar və hökm çıxarır. Haqqımda belə bir qərar çıxarmasına səbəb isə mənim hər zaman öz hüquqlarımın pozulması, həmçinin rayonun vəzifəli şəxsləri tərəfindən qanun pozuntularına rast gəldiyim zaman bu barədə yuxarı dövlət orqanlarına müraciətlər etməyimdir. Bu müraciətlərimin dayandırılması üçün mənə qarşı rayonda böyük təzyiqlər var. Nəinki mən, hətta bütün ailə üzvlərimiz bu təzyiqlərdən əziyyət çəkirik. Hər dəqiqəbaşı ailə üzvlərimiz təqib olunur. Mən mütəmadi olaraq iynə və dərmanlardan istifadə edirdim, xəstəxana şəraitində müalicə alırdım, lakin məni həm qərəzli şəkildə, həm də sifarişlə azadlıqdan məhrum etmişlər. Yəni, birbaşa həyatımı təhlükəyə atmışlar. Xəstəliyimin ciddi olması barədə məhkəməyə sənədlər təqdim olunub”.
Məsələ ilə bağlı Siyəzən Rayon Məhkəməsinə müraciət etdik. Məhkəmənin dəftərxana müdürü Xanlar Vahabzadə Yeniavaz.com-a bildirdi ki, o bu cəzadan narazı qaldığı üçün belə deyir: “Bu əlbətdə ki, boş söhbətlərdi. Belə deməsi normaldır. İnsan istər inzibati, istər cinayət işi üzrə cəzalandırılan zaman, əlbətdə ki, nəsə deyəcək. Belə görünür ki, o bu cəzadan narazı qaldığı üçün belə deyir. Demokratik ölkədə yaşayırıq, o istədiyi fikri səsləndirə bilər. Əgər onun hər hansı bir etirazı varsa, bu ancaq hüquqi müstəvidə həll oluna bilər”.