Neftçaladakı “balıq bazarı” qalmaqalı ilə bağlı redaksiyamıza yeni məlumatlar daxil olub.

Azerinfo.az-ın Avropa.info-ya istinadən yaydığı xəbərdə bildirilirdi ki, Məhəmməd Fərziyev rayon icra hakimiyyətindən 20 Yanvar əlilləri üçün ayrılan müavinəti ala bilmir.

Məlumat almaq üçün icra başçısının humanitar məsələlər üzrə müavini Gültəkin Sadıqova ilə əlaqə saxlamışdıq. G. Sadıqova məsələdən xəbərsiz olduğunu və məsələni araşdırıb bizə məlumat verəcəyini bildirmişdi.
Daha sonra isə Məhəmməd Fərziyevin qardaşı Zakir Fərziyev redaksiyamıza zəng edərək G. Sadıqovanın sürücüsünün müavinəti götürməsi üçün M. Fərziyevə zəng etdiyini bildirmişdi.

Bu gün Z. Fərziyev yenidən Avropa.info-nun redaksiyasına zəng etmişdi. O qardaşı Z. Fərziyevin bu gün icra hakimiyyətinə getdiyini amma yenə bir nəticə əldə etmədiyini bildirmişdi.
Onun sözlərinə görə icra hakimiyyətinə gedən M. Fərziyevi orada təlimatçı Bahadır Məcidov qarşılayıb. O M. Fərziyevə 20 yanvar əlilləri üçün ayrılan müavinətin prezident İlham Əliyevin fərmanı ilə deyil məhz icra hakimiyyətinin təşəbbüsü ilə həyata keçirildiyini söyləyib.

B. Məcidov deyib ki, icra hakimiyyəti öz hesabına 20 yanvar əlillərinə yardım etmək qərarına gəlib və bir neçə əlilə yardım olunub. Vəsait qalmadığı üçün icra hakimiyyəti M. Fərziyevə müavinət verməkdən imtina edib.
Redaksiyamız bu gün yenə G. Sadıqovayla əlaqə saxlamaq istəsə də səylərimiz boşa çıxıb. G. Sadıqova telefon zənglərimizə cavab verməyib.

Z.Fərziyev onu da qeyd edib ki, uzun müddətdir Neftçala rayon icra başçısı İsmayıl Vəliyev rayonda yeni balıq bazarı tikdirdiyindən öz bazarını işə salmaq üçün rəqib bazarı sökdürmək qərarına gəlib: "İ. Vəliyev vəzifəsindən sui-istifadə edərək, rəqib bazara hər cürə təzyiq göstərməklə bu günə kimi həmin bazarın işçilərinin 95 %-ni öz bazarına cəlb etməyə nail olub".