25 ilə yaxındır ki, mavi yanacaq sarıdan əziyyət çəkən Goranboy rayonunun Yolqullar kəndinin sakinlərinin bu həsrətinə son qoyulur. 170-ə yaxın evdə yaşayan 1000-dən artıq kənd sakini fevral ayının sonlarında qazla tam təmin olunacaq.

Qış aylarında soyuqdan qorunmaq üçün illərdir odun, təzək yandırmaq məcburiyyətində qalan Yolqullar kəndinin sakinləri gələn aydan etibarən evlərini mavi yanacaqla isidəcəklər. 2013-cü ildə Dövlət Proqramına uyğun olaraq kəndin qazlaşması aparılsa da podratçı şirkətə maliyyə vəsaitinin dayandırılmasıyla işlər yarımçıq qalıb. Lakin bu ilin əvvəllərindən başlayaraq kəndə qaz xətlərinin çəkilməsi işləri sürətlənib. Hazırda podratçı şirkət kənddaxili qaz xətlərinin çəkilməsi, sayğacların quraşdırılması işlərini aparır.
Nadir Həsənov- iş icraçısı: "Kəndin girəcəyini 108-lik borularla işləmişik, kəndin küçələrinə isə 76-57 diametr borular çəkmişik. Fevral ayında işlərimiz tam yekunlaşdıqdan sonra qaz xətlərində sınaq işləri aparılacaq və Goranboy Qaz İstismar Sahəsinə təhvil veriləcək".

Podratçı şirkət hazırda Goranboyda Yolqullar kəndi ilə yanaşı Qaraçinar və Veyisli kəndlərində də qaz xətlərinin çəkilməsi işlərini görür. Goranboyda 2 şəhər mərkəzi və 44 kənd, eləcə də qəsəbə qazla təmin olunub və mavi yanacaqdan 17239 abonent istifadə edir. 2015-16-cı illərdə dövlət proqramına uyğun olaraq rayonun daha 33 kəndinin mavi yanacaqla təmin olunması planlaşdırılır.

kepeztv.az