"Neftçala rayon icra hakimiyyətinin başçısı İsmayıl Vəliyev balıq bazarı uğrunda mübarizədə yeni metodlara əl atır."

Azerinfo.az bildirir ki, bu barədə Avropa.info-ya rayondakı balıq bazarının sahibi Məhəmməd Fərziyevin qardaşı Zakir Fərziyev məlumat verib.

Z.Fərziyev deyib ki, icra başçısının müavini Əlkömək Babayev rayon sanitar epidemioloji stansiyanın həmin bazar üzrə məsul nümayəndəsi Mələk Hüseynovayla əlbir olaraq bazarda işləyənləri cərimə ediblər.

O bildirib ki, bazarda işləyən 40 nəfərin ünvanına məktub göndərilərək məhkəmə orqanlarına dəvət olunublar.

Məktubda həmçinin həmin şəxslərə qarşı cərimə tətbiq olunduğuna dair məlumat yer alıb. Onların hər birinə 200-300 manat arası cərimə tətbiq olunub.
Z. Fərziyev həmçinin M. Hüseynovanın 3 gündür işə gəlmədiyini bildirib.

“M. Hüseynova təqaüddədir. O da başının ağrımasını istəmir. M Hüseynova və rayon icra hakiminin müavini Ə. Babayev cərimə tətbiq olunan şəxslərə bildiriblər ki, əgər icra başçısının tikdirdiyi bazara köçsələr, onlara tətbiq olunan cərimə ləğv olunacaq. Yeni bazara köçməkdən imtina edənlərə isə sonra hər ay cərimə tətbiq olunacaq və onlara işləməyə imkan verilməyəcək”,-deyə o bildirib.
Z.Fərziyev deyib ki, İcra Hakimiyyəti tərəfindən vəzifələndirilən polis əməkdaşları Bəybala Qasımov və Xəqani Səfərov bazarda qoçuluq edərək işçilərə qarşı hər cürə tərbiyəsizlik edirlər: "Onlardan biri bazarda, digəri isə balıqçıların ovlandığı yerdə insanlara əziyyət verirlər".

Avropa.info mövzu ilə bağlı qarşı tərəfin də mövqeyini dərc etməyə hazır olduğunu bildirir.