Kəpəz tv-nin əməkdaşları Tovuzun Yuxarı Öysüzlü kəndindən maraqlı material hazırlayıblar. Burada yaşayan qadınlar ənənələrimizi qorumağa çalışırlar. Necə? Onlar heç olmasa gündə bir dəfə yığışıb azı 1 əsr yaşı olan səhənglərini də götürüb bulaqdan su götürməyə gedirlər. Ağırlığından şikayət etməyən kənd sakinləri səhənglərində gətirdikləri bulaq suyundan hazırlanan çayın tamamilə başqa bir dada sahib olduğunu deyirlər.

Qadınlar misdən düzəldilən bu qədim qabları ağır olmasına baxmayaraq uzaq məsafədən çiyinlərində rahat daşıyırlar. Demək olar ki, hər gün bir-birini səsləyib bulağa gedən qadınlar çəkisi 20 kq olan səhəngin ağırlığından şikayət etmirlər. Tovuzun Yuxarı Öysüzlü kəndində hər kəsin evində nənələrdən yadigar qalan 100-150 yaşlı belə səhənglər var.

Kəndin yaşlı qadınları səhənglərdən necə istifadə etməyi, onu dolu halda hansı formada çiyinə qaldırıb aparmaq qaydalarını gənc qızlara da öyrədirlər.

Uzun yolun yorğunluğunu çıxarmaq üçün isə qonşular bir yerə toplaşaraq bulaq suyundan samovar qaynadırlar.

kepeztv.az